Área
judisial timoroan nian ikus ne'e "sai aat ba beibeik", ho
desinvestimentu hapara Tribunal Rekursu no falta meiu sira hodi kombate
korupsaun, hatete hosi Prezidente Repúblika iha loron-tersa ne'e.
Iha
diskursu ida hodi hahú sesaun lejislativu, iha Parlamentu Nasional, Taur Matan
Ruak ko'alia kona-ba área ida ne'ebé fraku liu iha nasaun, hodi konsidera katak
seidauk kumpri organizasaun judisiáriu ida ne'ebé previstu iha Konstituisaun.
Nia
hatete katak falta instalasaun hosi tribunal sira ne'ebé previstu, aprovasaun
ba lejislasaun sentral ba funsionamentu hosi tribunal sira nian no lejislasaun
ne'ebé regula Prosesu Administrativu no Fiskal, "kondisaun hosi
konstrusaun Estadu Direitu nian iha Timor-Leste".
"Desinvestimentu
iha Justisa hapara Tribunal Rekursu no impede kareira sira hosi juís sira iha
Tribunal Distrital sira, tanba laiha avaliasaun adekuadu no falta implementa
protokolu sira ne'ebé asina hafoin hasai majistradu internasional sira ne'ebé
uluk apoia prosesu reforma hosi Justisa nian", nia afirma.
"Falta
meiu sira hosi área Justisa hanesan obstákulu ba luta, ne'ebé tenki hanesan ema
tomak nian, hasoru korupsaun", nia hatutan.
Xefe
Estadu defende tan meiu sira no aumenta apoiu ba polísia sira, Komisaun hasoru
Korupsaun, Ministériu Públiku no ba Tribunal sira "iha luta hasoru
problema boot ida" ne'ebé afeta sosiedade timoroan.
"Ema
balun ne'ebé iha priviléjiu abuza iha rekursu sira ne'ebé hanesan ema tomak
nian halo ita kestiona kona-ba koezaun sosial, afeta redistribuisaun hosi
rikusoin no hamenus potensial hosi dezenvolvimentu nasaun nian", nia hatete.
"Ha'u
apelu ba partisipasaun hosi ema tomak iha esforsu nasional hodi halakon korupsaun
iha ita nia nasaun", nia afirma ona.
SAPO
TL ho Lusa
Sem comentários:
Enviar um comentário