Prezidente timoroan husu Orsamentu "prudente no responsável" ba 2017

Iha loron-tersa ne'e Prezidente Repúblika timoroan apela ona ba Governu ho ba Parlamentu Nasional atu aprova Orsamentu Estadu ida "prudente no responsável" ba tinan 2017, hodi reflete inserteza hosi rikusoin petrolíferu sira hosi Tasi Timor nian.

"Ha'u hein katak, la hanesan ho asaun sira ne'ebé ita hala'o t'o agora, preparasaun ba Orsamentu Jeral Estadu nian ba tinan 2017 no ba tinan hirak oinmai sei muda maka'as no bazeia iha realidade hosi folin petróleu nian no hosi rezerva sira Tasi Timor nian ne'ebé hanesan laloos", Taur Matan Ruak hatete.

"Nia preparasaun tenki halo ho planeamentu di'ak ida, prudente no responsável, hodi haree ba prezente no futuru", nia hatete iha sesaun solene hodi hahú sesaun lejislativu dalima hosi lejislatura atual.

Taur Matan Ruak, ne'ebé suspende ona Orsamentu ba tinan 2015, insisti ona katak konta públiku sira ba tinan 2017 labele bazeia hosi levantamentu maka'as hosi Fundu Petrolíferu nian ne'ebé, nia subliña ona katak, gasta ona osan dolar biliaun 7,3.

"Ita la halo buat barak ho osan ne'ebé gasta. Ita sei moris nafatin iha ekonomia ida ne'ebé la sustentável: nasaun importa kuaze buat hotu ne'ebé ita konsumi no ladún halo esportasaun. Desperdísiu iha Administrasaun Públiku signifika osan ne'ebé gasta lahó nesesidade", nia hatete.

Nia insisti, tanba ne'e maka konta sira ba 2017 tenki finansiadu hosi fonte prinsipal haat: Rendimentu Sustentável Estimadu (RSE) hosi Fundu Petróleu nian, reseita doméstiku, doasaun sira no empréstimu sira no esportasaun sira.

"Ita uza reseita sira hosi Fundu Petroléu nian hodi selu fatura sira: selu défise boot hosi ita nia balansu komersial no selu funsionamentu hosi aparellu Estadu nian", nia hatete.

"Ita hatene katak petróleu la dura nafatin. Bainhira petróleu hotu, ita sei halo saida? Reseita sira hosi Fundu Petróleu nian iha redusaun maka'as, tanba produsaun ki'ik iha Bayu Undan no folin petróleu ne'ebé tuun maka'as iha merkadu internasional sira, hahú hosi tinan 2014. Iha rezumu, ita hotu iha dever hodi husu no hatán ho honestidade: Futuru saida maka ita harii daudaun ba ita nia nasaun?", nia hatete.

Iha análize hosi tinan hirak ikus ne'e, no entre krítika sira ba aspetu oioin administrasaun nian, Taur Matan Ruak refere ona ba susesu hosi prosesu rekonsiliasaun nasional, ba konstrusaun hosi Estadu ida Direitu nian no ba estabilidade polítika no sosial, "vitória ida hosi ema hotu nian, hosi líder sira no hosi sidadaun sira".

Lori enerjia ba 90% resin hosi populasaun, estrada ho kilómetru 200 resin, eskola sira, rede sira kuidadu saúde nina, aranka ba desentralizasaun ekonómiku no apoiu sira ba grupu fraku sira hanesan aspetu pozitivu sira ne'ebé nia destaka ona.

Taur Matan Ruak felisita mós rekoñesimentu ne'ebé fó ba veteranu sira hosi luta timoroan nian, hodi nota katak hanesan prosesu "inkompletu" ida ne'ebé "balun simu apoiu no sira seluk seidauk simu", nune'e hamosu "divizaun sira entre veteranu sira rasik".

Iha tempu hanesan nia hato'o preokupasaun ba sustentabilidade hosi projetu pensaun veteranu sira nian, hodi apela ba sira ne'ebé simu hodi "tulun Estadu hodi halo justisa, hodi evita gastu maka'as, hodi fó onra ba kapítulu hosi istória ba libertasaun nasaun nian".

SAPO TL ho Lusa