DILI,
(ANTIL) - Xefe Estadu Taur Matan Ruak kontinua kontra Lei Pensaun Vitalísia ba
eis titulár sira no konsidera lei ne’e kria tiha sistema ida ne’ebé fó ezemplu
ladi’ak ba sidadaun sira.
Iha
kazu balun, tuir Taur, Lei Pensaun Vitalísia bele kria parazitas tanba
ful-fulan simu osan boot hosi Estadu maibé ema balun la halo buat ida ba
sosiedade hodi selu fali apoiu laran luak ne’ebé fó ba sira.
“Sistema
ida hanesan ida ne’e injustu tebe-tebes bainhira kompara ho situasaun hosi
veteranu sira no ema hirak ne’ebé maka moris kiak duni iha ita nia rain,” Taur
dehan iha nia deskursu bainhira loke Terseiru Lejizlasaun Sesaun Lejizlativu ba
dala 5 iha Parlamentu Nasionál (PN), Tersa (20/9).
Nia
dehan partidu polítiku sira hatene katak Lei Pensaun Vitalísia la justu. Tanba
ne’e maka sira (membru PN) promete halo revizaun ba Lei, iha tempu besik ona ba
eleisaun. “Ha’u lembra rona promesa hirak ne’e iha 2011 no 2012. Maibé, liu
tiha tinan haat ha’u seidauk haree proposta ida atu halakon ka halo revizaun ba
lei ida ne’e. Ha’u husu ba ha’u nia an rasik, hanesan ita nia maun-alin no
inan-feton timoroan barak mós husu, tanba sá?,” Taur Kestiona.
Prezidente
repúblika apelu ba deputadui sira no mós ba líder nasionál hotu-hotu ne’ebé mak
kaer responsabilidade polítika, atu fó prioridade ho laran tomak ba kestaun ida
ne’e.
“Ha’u
halo apelu ba Parlamentu Nasionál atu loke debate públiku luan ida ne’ebé
transparente, simples no momoos kona-ba benefísiu no vantajen hirak ne’ebé
prevé iha Lei nú. 1/2007, hosi 18 Janeiru, kona-ba Pensaun Mensál Vitalísia ba
Deputadu sira no Regalias sira seluk, no mós kona-ba Lei nú. 14/2009, hosi 21
Outubru, ne’ebé mak estabelese remunerasaun ba titulár kargu polítiku sira,”
nia informa.
Taur
afirma katak bainhira rona povu nia opiniaun, diskute no halo alterasaun ne’ebé
presiza ba lei sira ne’e, sei hasa’e justisa iha sosiedade nia laran no mós
sidadaun sira nia respeitu ba ita nia instituisaun demokrátika sira. (Jornalista:
Xisto Freitas / Editor: Gantry Meilana)
Foto:
Imajen Palásiu Prezidénsia Repúblika
Sem comentários:
Enviar um comentário