Timor-Leste Konsege Afirma Nia Imajen iha Mundu

DÍLI, (ANTIL) - Prezidente Repúblika, Taur Matan Ruak hateten, hahú restaurasaun indepedénsia Timor-Leste (TL) konsege afirma nia diplomásia no imajen iha mundu.

“Diplomasia timoroan konsege hasai vantajen no haburas tan diplomasia rezisténsia nia imajen ho rigor. Diplomasia ne’ebé ita hala’o, molok no hafoin indepedénsia kontribui TL nia afirmasaun iha mundu,” hatete Prezidente da Repúblika, Taur Matan Ruak iha nia intervensaun iha Parlamentu Nasionál (PN), Tersa, (19/09).

Prezidente Repúblika hatutan, komunidade internasionál rona apelu ne’ebé ita timoroan hotu no frente armada sira halo ba paz durante luta nomós frente diplomátika serbisu maka’as ho neon.

Diplomásia Timor-Leste, nu’udar nasaun independente, fó kontinuidade no hariiku tradisaun diplomátika, ho nune’e tulun hametin estadu no haforsa kondisaun nesesáriu hodi hala’o soberania nasionál.

Prezidente mós reforsa katak parseiru multilateral ka bilateral ne’ebé TL halo ho nasaun unida no parseiru dezenvolvimentu kontribui realiza prioridade no konstrusaun nasionál.

“Apoiu husi ita nia nasaun belun sei importante iha área oioin. Ha’u hakarak temi liliu apoiu ne’ebé sira fó ba ita nia esforsu dezenvolvimentu sosiál, valorizasaun setór produtivu nasionál no diversifikasaun ekonomia,” tenik PR, Taur Matan Ruak.

Taur Matan Ruak mós reforsa katak susesu ne’ebé polítika paz no rekonsilisaun hetan ona, kontribui dezenvolve no hametin relasaun amizade no koperasaun ho nasaun viziñu hanesan Indonézia no Austrália iha kontaktu familiar, interkánbiu kulturál, sosiál no ekonómiku.

“Kooperasaun fronteira entre Timor-Leste no Indonézia kontribui ona no sei kontribui nafatin atu intensifika komérsiu no kontaktu entre família sira, ho vantajen ba populasaun sira ne’ebé hela besik fronteira entre nasaun rua ne’e,” Taur haklaken.

Atu konklui nia realsa tan katak relasaun Timor-Leste ho nasaun membru Association of South East Asean Nation (ASEAN), halu’an no hakle’an tiha ona, hein de’it konkordánsia husi nasaun membru atu TL bele halo adezaun.

Inklui durante ne’e, hala’o relasaun amizade no kooperasaun ne’ebé metin ho poténsia Áziatika no mundiál hanesan Xina, Estadus Unidus, Uniaun Europeia, Japaun, Repúblika Koreia, Kuba no Nova Zelándia nomós Portugal, Brazil inklui nasaun maun alin CPLP (Comunidade dos Países da Língua Portuguesa) sira. (Jornalista: Rafy Belo / Editora: Rita Almeida)

Foto: Prezidente Taur Matan Ruak