DÍLI,
(ANTIL) - Timor-Leste nia prezidénsia pro tempore ba Comunidade
dos Países da Língua Portuguesa (CPLP) hatudu dalan importante ne’ebé
nasaun la’o liu ona, husi luta iha foho leten no husi ezíliu to’o iha lideransa
ba komunidade nasaun independente no maun-alin nian ba dala uluk.
“Ita
nia maun alin sira CPLP konsidera ita nia lideransa nu’udar ezemplu ida.
Rekoñesimentu ida ne’e bele sai hanesan orgullu ida ba ita no estímulu ida ba
futuru,” hateten xefe estadu perante deputados no konvidadu espesiál iha
Parlamentu Nasionál (PN), Tersa (20/09).
Xefe
estadu, Taur Matan Ruak afirma katak Timor-Leste (TL) tama formalmente iha CPLP
no bele hala’o konferénsia xefe estadu no governu CPLP sira nian iha Ázia,
rejiaun ne’ebé konsidera hanesan eixu husi ekonómia mundu nian.
“Ita
nia país asume CPLP hanesan plataforma ida atu permite artikulasaun oioin
ne’ebé la’o husi nia kondisaun plurikontinentál. Tanba ne’e mak ita hala’o
Forum Ekonómiku Globál no ita iha oportunidade atu konta ho prezensa ASEAN,”
tenik tan Prezidente Pepúblika, Taur Matan Ruak.
Prezidente
Repúblika mós hateten katak iha domíniu lian portugés Timor-Leste iha
privilejiu simu terseira konferénsia internasionál kona-ba futuru lian portugés
no sistema mundiál.
Maske
nune’e, PR rekuñese katak buat barak mak labele hala’o hotu. “Konjuntura mundu
nian ne’ebé afeta estadu membru sira, trava hodi hala’o inisiativa ne’ebé ita
nia prezidénsia hatudu dalan, ho apoiu husi ita nia komunidade,” nia subliña.
PR
konfesa tan katak direitu internasionál sai nu’udar huun ba paz no hanesan
pontu partida atu buka kondisaun ne’ebé ekilibru liu ba dezenvolvimentu no povu
sira nia moris di’ak.
Timor-Leste
nia integrasaun internasionál orienta ba reforsu husi sistema mundiál ida
ne’ebé justu, ne’ebé bazea ba direitu no promove estabilidade, paz no
dezenvolvimentu ne’ebé inkluzivu no sustentadu.
Nasaun
membru Comunidade dos Países da Língua Portuguesa (CPLP) mak Angola,
Brazil, Cabo Verde, Guiné Bissau, Guiné Equatorial, Moçambique, Portugal, São
Tomé e Principé e Timor-Leste. (Jornalista: Rafy Belo / Editora: Rita Almeida)
Foto:
Comunidade dos Países da Língua Portuguesa (CPLP)
Sem comentários:
Enviar um comentário