Expo Internasionál Indústriál Atu Estabele Ligasaun Ho Kompañia Internasionál

DILI, (ANTIL) - Kooperasaun Ministériu Komérsiu Indústria no Ambiente (MKIA) ho PT. MEGAWATT ASIA ba Industrial Expo Timor-Leste 2016 importante tebes, atu marka produtu no estabelese ligasaun ka networking ho kompañia internasionál sira, hodi  fa’an produtu sira bá iha rai-liur. Maske  indústria Timor-Leste sei ki’ik no laiha buat boot, indústria ki’ik sira ne’ebé iha  bele  esplora ba iha rai seluk.

Ministru Constâncio Pinto koália ida-neé iha salaun enkontru MKIA, Segunda (26/9) ba jornalista sira. Nia hateten, Timor-Leste halo ona esportasaun ba produtu balun, hanesan kafé no masin ba nesesiade merkadu Ázia nian. “Maibé  ba futuru, ita mós atu kria indústria ho kapasidade boot para bele esporta ba rai-liur”, Ministru dehan.

Ministru Constancio esplika, indústria mak setór ida ne’ebé importante tebes ba dezenvolvimentu ekonomia Timor-Leste. Enkuantu, planu estratéjiku dezenvolvimentu la foku liu ba indústria maibé foku ba agrikultura, turizmu no indústria petróleu. “,Maibé ita haree katak, indústria sira seluk ne’e importante tebes, bainhira ita haree mina nia folin iha mundu komesa tún. Iha ona impaktu ba ita-nia rezerva, ne’ebé iha banku rai-liur ne’ebá. Tanba  ne’e,  mak ita buka atu promove liután ita-nia indústria iha ita-nia rai-laran”, Ministru hato’o iha konferensia  imprensa.

“ IIa mós hakarak  dezenvolve  deviza non-oil”,  hanesan  husi .Indústria  manufatura, ai-han,  mobiliáriu, agro-indústria no indústria turizmu nian. Nuneé, liuhusi espozisaun, la’ós’de’it iha Timor-Leste,  maibé partisipa mós iha rai seluk, hanesan iha Milaun-Itália ne’ebé hetan atensaun barak, liuluu ba  iha kafé no mina nuu ka virgin coconut oil.

Diretora Marketing PT MEGAWATT ASIA, Syelly Phie esplika, kooperasaun MEGAWATT ho MKIA  ba Expo Internasionál Indutriál Timor-Leste nia main reset mak iha kompañia internasionál sira barak mak hakarak tama iha nasaun ne’ebé foun no presiza dezenvovimentu infra-estutura. Tanba iha infraestrutura nia laran, iha forsa, enerjia, water treathment no lighting technology. “Ami iha ne’e, lori komponente hotu husi infraestrutura atu dezenvolve teknolojia infaraestrutura foun atu lori mai Timor-Leste”, Syelly dehan.

Espozisaun internasionál iha TL ne’e, mai husi ideia partisipante nee’bé hakarak tama no investe iha TL, tanba kondisaun ekonomia TL hahú dezenvolve no infraestrutura ne’ebé hala’o ba tinan lima to’o sanulu ba oin. “Ami espera ho eventu ida ne’e, bele kria no update dezenvolvimentu indústria iha setór balun iha Timor-Leste”, Syelly haktenik.

Enkuantu husu kona-ba perpetiva depois espozisaun ne’e, Syelly Phie hateten, iha investór balun ne’ebé investe ona iha TL no partisipante porsentu 70 ne’e mak empreza foun ne’ebé ho planu atu tama iha TL.

Atu investe iha nasaun ida, presiza haree situasaun no kondisaun. Espera liuhusi espozisaun  no atendimnentu ne’ebé di’ak, liuliu MKIA, ho suporta governu hodi haree kondisaun iha TL koduzivu no iha merkadu ne’ebé boot ho suporta direita husi Governu TL, nia impaktu sei pozitivu tebes.  Orsamentu ba espozisaun ne’e kuaze US$150.000 ne’ebe lainklui produtu sira ne’ebé atu lori mai TL.

Expo Internasionál Indústriál 2016 ne’e hahú  loron 28-30 Setembru  iha Sentru Konvensaun Dili, sei partisipa husi empreza internasionál 60, inklui profisionál indústria sira hamutuk 3000., sei hatudu  produtu 100  husi nasaun 10.   (Jornalista: Maria Auxiliadora / Editor: Otelio Ote)

Foto: Ministru Komersiu, Industria no Ambiente, Cnnstancio Pinto iha konverensia imprensa, Segudan (26/9) akompanha husi Diretora Marketing PT MEGAWATT ASIA, Syelly Phie. Foto Antil