Timor-Leste Hakarak Moderniza Fasilidade Transporte Iha Futuru

DILI (ANTIL) – Timor-Leste hakarak atu moderniza fasilidade transporte terestre iha futuru, liuliu husi Dili ba Atambua to’o  Kupang, Indonezia, segundu  Vise Ministru Obras Públikas, Transporte no Komunikasaun, Inácio Freitas Moreira informa ida-ne’e ba ANTIL iha nia knaar fatin, Kaikoli-Dili, Sexta (02/09).

“To’o ona tempu atu dezenvolve ita-nia transporte teréstre no presiza  moderniza. Tanba ho mundu globalizadu ohin-loron,  ekonomia aumenta no halo nesessidade transporte loron-loron sai aumenta,   ita preaiza transporte di’ak,”Inacio Moreira esplika.

Governu Indonezia preparadu atu asina Nota Intendimentu ho Timor-Leste kona-ba operasaun Bis DAMRI, hodi atende pasajeiru husi Dili- Kupang Ba-Mai. ” Ita presiza dun kondisaun  hanesan Bis DAMRI, atumobilizasaun ema no sasan  la’o ho efisiente no efetivu”,  Inácio dehan.

Nia dehan,  Governu Timor-Leste atu kolabora. ” Ohin -oron ami halo hela aprosimasaun no-mós estudu viabilidade atu halo rute ba Dili-Atambua-Kupang,” nia dehan.

Dezonvolvimentu transporte terestre, tuir Vise Ministru,   buat di’ak tanba sei aumenta ema nia mobilizasaun   husi nasaun vizinhu sira ba-mai. Timor – Leste nia kondisaun  estrada ne’ebé di’ak, bele  halo negósiu no automatikamente bele aumenta velosidade ekonómia iha rai laran.

Nia informa, iha tempu badak, Estadu rua se halo akordu bilateral ida atu bele koopera  no deside téknikamente ba nia estasaun, rute, oráriu, presu no buat seluk tan. Ministeriu Negósiu Estranjeiru no Kooperasaun mak iha kompetensia tomak atu halo negosiasaun ne’e.

”Wainhira Bus DAMRI kria kondissaun  ho kualidade di’ak, iha  vantajen  boot ba populasaun. Tanba  ema barak  presiza no atividade ekonómika la’o maka’as no diak liutan. (Jornalista: Julia Chatrarina/editor: Otelio Ote)

Foto: Vice Ministru Obras Públikas, Transporte no Komunikasaun II, Inácio Freitas Moreira kulia ba ANTIL iha nia k’nar fatin, Kaikoli-Dili iha Sesta (02/09) (Foto ANTIL: Julia Chatarina)