Simeira G20 haree liu ba ekonomia, maski hosoru konflitu diplomátiku

Iha senáriu internasionál ne’ebé hasoru konflitu diplomátiku no territoriál, simeira G20 sei hala’o iha Xina iha sidade Hangzhou ih loron 4 no 5 setembru, ho ajenda ne’ebé domina liu ho ekonomia mundiál.

Reuniaun prinsipál ekonomia mundiál nian, ne’ebé sei hala’o iha Sentru Espozisaun Internasionál iha kapitál provínsia xineza Zhejiang, ho tema "Avansa ba ekonomia mundiál inovadora, vigoroza, interkonektada no inkluziva".

Nia objetivu mak "hari’i globalizasaun ida sein setór sosiál sira ne’ebé bele sente prejudikadu" no "elabora planu estímulu ida ba ekonomia mundiál", anunsia organizadór xinés sira.

Durante a simeira iha Brisbane, Austrália, iha 2014, líder sira G20 nian estabelese meta mak hasa’e ritmu kresimentu sira-nia Produtu Internu Brutu ba pursentu rua, to’o 2018.

Objetivu ne’e agora hetan ameasa hosi "Brexit", ba volatilidade iha merkadu finanseiru, tanba folin matéria-prima sira tun no tanba ekonomia Xina no nasaun emerjente sira seluk nian tun.

"Ami konfirma área prioritária sia no prinsípiu orientadór 48 ba reforma estruturál G20 nian (...), ne’ebé sei sai importante hosi alkansa objetivu ne’ebé trasa ona iha Brisbane", afirma iha semana kotuk ministru Finansa xinés, Lou Jiwei.

Konsensu polítika ne’ebé bele estimula kresimentu mundiál kontrasta, maibé, ho agravamentu tensaun rejionál no divizaun jeopolítika.

Funu iha Síria, krize ukraniana, disputa territoriál iha Pasífiku no instabilidade iha península koreana sei sai hanesan tema atu debate.

Konflitu síriu, ne’ebé prolonga horikedas 2011, fahe prezidente Estadus Unidus, Barack Obama; Rúsia, Vladimir Putin; ho Turkia, Recep Tayyip Erdogan.

Intervensaun turka foin lalais iha nasaun viziñu, iha ne’ebé bombardeia dala ida forsa organizasaun terrorista Estadu Izlámiku (EI) no kombatente kurdu sira, aliadu sira EUA nian, inviabiliza tan estratéjia komún ida.

Ankara ho Moskovu, ne’ebé kontra kona-ba atu retirada Prezidente síriu, Bashar al Assad, agora mosu tan aliñadu.

Xina mós hamutuk ho Rúsia iha tabuleiru sírio no, foin lalais, anunsia katak sei fó asisténsia umanitária ba forsa armada síria sira.

Mabé Pekin hakarak atu, liuliu, lahatama iha ajenda disputa territoriál iha Tasi parte  Súl Xina nian no iha Tasi Xina Orientál.

Segunda maiór ekonomia iha planeta konsolida nafatin nian papél iha planu internasionál, ho inisiativa sira hanesan banku internasionál investimentu foun ka jigante planu infraestrutura "Nova Rota da Seda".

Nia ekonomia nia forsa, motór rekuperasaun globál, horikedas krize finanseira 2008, sei fó dalan ba nasaun ne’e atu reklama papél sentrál iha jestaun asuntu internasionál sira.

Maibé, iha planu rejionál, postura loos ne’ebé Xina adota, horikedas atuál Prezidente xinés, Xi Jinping nia podér sa’e iha 2013, sai hanesan alvu protestu hosi parte Washington, Japaun no nasaun oioin iha sudeste aziátiku.

Iha Tasi parte Súl Xina nian, rekuza hodi akata desizaun tribunál internasioáal, ne’ebé hatete katak reivindikasaun xineza ba kuaze territóriu hotu laiha baze legál, no hetan krítika hosi membru G20 oioin.

Kona-ba Tasi Xina Orientál, disputa ne’ebé mantein ho Tóquio kona-ba soberania arkipélagu Diaoyu (Senkaku ba Japaun), hamosu hikas tensaun entre nasaun viziñu rua.

Foku tensaun rejionál seluk rezide iha península koreana, iha ne’ebé desizaun Koreia Súl nian hodi instala eskudu antimísil norte-amerikanu THAAD, hodi hatán ba programa nukleár Koreia Norte nian, halo aat liután relasaun ho Pekin.

Tuir líder europeu sira, simeira bele sai hanesan oportunidade ida hodi valida kontroversu akordu entre Ancara ho Bruxelas, ne’ebé prevee deportasaun refujiadu sira hosi Europa ba Turkia.

Prezidente fransés, François Hollande, xanselér alemã, Angela Merkel, ho Putin, sei hala’o sorumutu mós hodi aborda renovada tensaun entre Rúsia ho Ukránia, tanba península Krimeia, ne’ebé Moscovo aneksa.

Simeira sei marka mós ho despedida Barack Obama nian, ne’ebé sei reuniaun bad ala ikus ho Xi Jinping.

Estadista rua ne’e tenke ratifika akordu klima nian, ne’ebé alkansa durante konferénsia Paris (COP21), iha tinan kotuk.

SAPO TL ho Lusa