Traballadór timor-oan iha Koreia Sul hatama ona remesas 16 MUSD iha tinan haat nia laran

Traballadór timor-oan sira ne’ebé bá serbisu iha Koreia Sul haruka ona remesas mai Timor-Leste liu dolár milloens hitu iha tinan kotuk no ho totál milloens 16,3 desde 2012, tuir dadus hosi administrasaun timor-oan nian. 

Tuir Dadus hosi Sekretaria Estadu ba Polítika Formasaun Profesionál no Empregu (SEPFOPE) ne’ebé Lusa hetan asesu ba, hatudu katak remesas ne’e aumenta beibeik desde programa refere hahú iha 2009.

Hosi 2012 to’o 2015, inkluziva, timor-oan besik 1.400 maka bá serbisu iha Koreia Sul, bazeia ba protokolu entre Governu nasaun rua nian, no traballadór sira ne’e fó ona kontribuisaun ba ekonomia nasionál hamutuk dolár milloens 16,38.

Kuaze metade hosi valór ne’e hanesan mos ho tinan kotuk, bainhira timor-oan sira ne’ebé bá serbisu iha Koreia Sul hamutuk 417, no númeru refere aumenta iha 2012 bainhira haruka tan traballadór 486.

Desde programa ne’e hahú iha 2009, timor-oan ne’ebé bá serbisu iha Koreia Sul hamutuk 2.139, barak liu bá serbisu iha área peska (1.240) no setór fábrika (776).

Tuir estudu hosi Organizasaun Internasionál ba Migrasaun (OIM), ne’ebé fó sai iha tinan kotuk, hatudu katak remesas hosi emigrante timor-oan sira maka sai fonte bot datolu iha tinan kotuk, ba balansa pagamentu iha rai-laran, hafoin mina ho gás naturál nomós kafé.

SAPO TL ho Lusa - Foto: SEFOPE