Tilman: Letura Akordaun Vale, Emilia Tenke Asina Notifikasaun

DILI – Tribunal Distrital Dili (TDD) aplika ona letura akordaun ho pena Prizaun tinan 7 ba Arguida Emilia Pires, maibe wanhira akordaun nee vale so Arguida Emilia tenke asina notifikasaun, se lae akordaun nee la vale.

Lia hirak nee hatoo husi Jurista Manel Tilman, ba Jornalista sira, iha nia knar fatin Pantai Kelapa Dili, Kuarta (21/12/2016).

Klaru ita bele uza meus ida liu husi Embaixador Timor Leste iha Portugal atu notifika nia, akordaun nee so vale kuandu hetan Arguida Emilia hodi asina, se naun serke dehan katak julgamentu iha revelia, maibe nee lae, nia julgamentu iha oin, too sentensa maka la iha, agora sentensa nee tenke notifika ba Arguida Emilia,” hateten Tilman.

Jurista Tilman mos hatutan tan katak  prokurasaun nee bele advogadu reprezenta, simu mos notifikasaun, se hanesan nee la presiza Emilia iha oin ida, ida nee fromalidades deit. Konaba kumpri ka la kumpri, nee sei iha rekursu, kuandu senteza transitada iha julgadu katak liu tiha 15 dias maka advogadu la halo rekursu, tenke hatun ona orden ba Polisia atu kaer arguida.

Iha parte seluk Observador Justisa Jasinto Rui de Fatima hateten TL nia embaixada iha nasaun barak inklui mos Portugal, tanba nee tenke serbisu hamutuk ho governu Portugal hodi lori fila Arguida Emilia mai para kumpri nia sala. Informasaun kompletu iha STL Jornal no STL Web, edisaun Kinta (22/12/2016). Joao Anibal

Suara Timor Lorosae