Deputadu 20 Falta, PN Adia Aprovasaun Alterasaun LPV

DILI: Tuir ajenda, iha Tersa (20/12) loraik Parlamentu Nasionál sei halo diskusaun no aprovasaun ba proposta alterasaun Lei Pensaun Vitalisia no eis Titular sira, maibé tenke adia tanba deputadu na’in 20 la marka prezensa.

Tuir regra, atu halo aprovasaun ba Lei ida, tenke hetan partisipasaun husi deputadu na’in 65, maibé iha diskusaun no aprovasaun LPV tanba deputadu na’in 45 mak marka prezensa, PN deside hodi adia ba tinan oin.

Deputadu Parlamentu Nasionál iha Sesta (23/12) sei hahú feriadu no sei tama fila fali serbisu iha loron 9 Janeiru 2017, no iha loron ida ne’e mak sei diskuti hodi deside sa loron mak atu halo diskusaun no aprovasaun ba LPV.

"Ha'u haree agora ita labele aprova (LPV) tanba ita la priense korum,” dehan eis Prezidente PN, Vicente Guterres liu husi intervensaun bankada.

Tuir deputadu husi Bankada CNRT ne’e, atu aprova alterasaun LPV ne’e deputadu 65 tenke marka prezensa.

Iha fatin hanesan, Deputadu Bankada Fretilin, Antoninho Bianco dehan, presiza deputadu hotu ninia partisipasaun iha diskusaun no aprovasaun ba lei sira.

“ Ita atu ko’alia lei tolu presiza ita hotu nia partisipasaun. Tanba ne'e, di’ak liu ita adia ba tinan oin,” dehan nia.

Entretantu, Deputadu Eladio Faculto afirma, tempu no kondisaun ladun permite atu aprova alterasaun LPV.

“Itania kondisaun la permite atu aprova LPV iha tempu ida ne'e. Di’ak liu ita fó tempu uitoan par ita bele haree di’ak liu tan,” katak nia. (*)

Tome Amado – Ola Timor - Editór: Tellukoro

Foto: Parlamentu Nasional adia aprovasaun ba alterasaun Lei Pensaun Vitalisia no eis Titular sira tanba deputadu sira la priense korum. (olatimornews FOTO: Aquino Campos)