Uma Fukun Hahú 'Silensiu'

LA HANESAN baibain. Laiha ‘lian hakilar’ husi edifisiu boot iha kapital Dili nia fuan ne’ebé hanaran Uma Fukun. Silensiu neneik hahú haksumik an iha kada etapa edifisiu ba reprezentante povu ne’e. Deputadu na’in 65 ne’ebé durante ne’e ‘hakilar’ sai povu nia lian ne’e hahú feriadu.

Tuir observasaun Olatimornews.com nota katak movimentu iha PN la hanesan baibain. Karreta membru PN balun para hela iha PN, maibé deputadu sira laiha.

Maske nune'e, membru PNTL sira ne'ebé toma responsalblidada ba seguransa iha PN, kontinua hala'o vizilansia.

Tuir informasaun, iha Kuarta (21/12), deputadu sira iha Parlamentu Nasionál hahú ona sira-nia periodu resesu. Reprezentante povu ne'e sei tama fali serbisu iha loron 9 Janeiru 2017.

Ho feriadu ne'e signifika lei importante hirak ne'ebé Parlamentu Nasionál ajenda ona atu diskuti no aprova, hanesan Lei Anti Korrupsaun, Lei Rai no seluk tan, tenke adia.

Molok ne'e, PN deside ona atu adia diskusaun no aprovasaun ba proposta alterasaun Lei Pensaun Vitalisia no eis Titular sira, ba tinan foun.

"PN feriadu ona horseik, (Kuarta) 21 Dezembru", informa Deputadu Bankada CNRT Cesar Pilotu ba jornalista sira, Kinta (22/12.

Nia dehan, agora laiha plenariia no atividade sira seluk. Atividade hotu sei hala'o fali iha 9 Janeiru 2017. (*)

Tomé Amado - Ola Timor - Editór: Tellukoro 

Foto: Deputadu sira iha Parlamentu Nasional hahu feriadu. Reprezentante povu ne'e sei tama fali serbisu iha 9 Janeiru 2017. (olatimornews FOTO: Aquino Campos)