sexta-feira, 3 de fevereiro de 2017

LERE: F-FDTL PRONTU HASORU DEZAFIU

PARTILHAR
Xefi Estadu Maior Falintil Forsa Defesa Timor Leste (F-FDTL), Maijor Jeneral, Lere Anan Timur, hateten, F-FDTL prontu hasoru dezafiu iha eleisaun Prezidensial no eleisaun parlamentar ne’ebe sei hala’o iha tinan 2017 ne’e.

“Ba ami nafatin atu hasoru dezafiu sira  ne’ebé mak sei mai liu-liu iha tinan ida ne’e. Tinan ida ne’e espesial liu ba povu Timor Leste, tanba  ita bolu dehan festa demokrasia,”esplika Jeneral Lere Anan Timur, iha ninia diskursu, aniversario tranferensia Falititil ba F-FDTL ba dala 16, ne’ebé mak hala’o iha Kuartel General Fatuhada-Dili, Kinta (02/02/2017).

Lere hatutan, mentalidade forsa armadas mak bele kria paz ho estabilidade iha rai laran. Tanba ne’e dala ida tan husu ba membrus F-FDTL hotu atu mantein disiplina no hala’o knar ho responsabilidade.

“Nasionalismu tenki maka’as signifika hadomi imi ninia rai hadomi imi ninia povu. Ligasaun juramentu ne’ebé mak imi halo bainhira imi hakotu juramentu dehan, ha’u jura kuandu ha’u nia sala ha’u fo ha’u nia vida so forsa armada mak jura liafuan ida ne’e. Imi orgulhu hatais farda  ne’ebé mak imi iha, simbolu bandera nasional ne’ebé mak imi tau imi ninia fuan, tau imi ninia liman, orgulhu ba ida ne’e, imi ninia nasionalismu, imi ninia patriotismu, respeita simbolu ne’ebé mak imi lori dadauk atu bele sai lutu lolos. Ba ita ninia nasaun ba  ita ninia povu e hanesan lema FALINTIL ninian orgulhu ba ita ninia povu e honra ba  ita ninia povu, unidade nasional ba ita ninia povu,”afirma Major Jeneral Lere Anan Timur.

F-FDTL marka istoria ba dezenvolvimentu

Liu husi aniversario transferensia Falintil ba FDTL ba dala 16, ne’e lori tan istoria ba dezenvolvimentu Timor Leste nian, tanba ne’e Chefe Estado Maior F-FDTL, Maijor Jeneral, Lere Anan Timur hato’o parabens ba veteranus sira hotu ninia esforsu.

“Parabens  ba fundadores liu-liu ba Veteranus sira ne’ebé hahu  iha Aileu  to’o ohin loron  balun ba  ona reforma,”haklean Maijor Jeneral Lere Anan Timur.

Lere  hato’o mós agardese ba Veteranus sira  ninia prezenza iha seremonia aniversario F-FDTL ne’e. tanba hatudu hanesan, respeitu konsilidasaun solidaridade no esperitu ami nafatin hakat ba oin nafatin.

Instituisaun F-FDTL hari’i iha tinan 2001 hodi haburas  an no asumi mós hanesan forsa ida ne’ebé disiplinadu, treinadu  no prontu nafatin kumpri ninia kna’ar, ohin hanesan instrumentu ida prinsipal.

“Iha espaso soberania ne’ebé ita define hanesan nasaun, maibe mós konstitui hanesan indikador iha demokrasia, e dezenvolvimentu pais no sei iha    kapasidade projesaun internasional,”hateten Lere Anan Timur.

Bem star ba F-FDTLsei mukit

Liu husi selebrasaun aniversario transformasaun FALINTIL ba F-FDTL ba dala 16 ne’e,  Chefi Estadu Maior Forsa Armadas Timor Leste (F-FDTL), Maijor Jeneral, Lere Anan Timur, hateten, bem star ba forsa armadas seidauk sufisiente.

“Ita koalia bem star ba forsa armadas ninian kleur ona, ha’u nudar forsa armadas imi nian, ha’u temi bebeik ha’u ninia prioridade ne’ebé ha’u sei komanda forsa armadas ha’u. Ha’u koalia kona-ba kantina militar, ha’u koalia kona-ba hospital militar, ha’u koalia kona-ba bairus militar ne’ebé mak seidauk sufisiente, to’o ohin loron sei mukit, ne’ebé Governu ida ba Governu ida fila ha’u hanoin katak, sira ninia planu mós ida deit halo oinsa atu dezenvolve forsa armadas Timor Leste bele sai  professional,”afirma Maijor Jeneral Lere Anan Timur.

Iha biban ne’e Maijor Lere Anan hato’o agradese ba Nasaun amigus hotu-hotu, organijasoens internasionais ne’ebé fo ninia apoiu tomak atu dezenvolve  forsa armadas to’o ohin loron.

“Hanesan Australia, Nova Zelandia, Portugal pais Asian, Xina, Japaun, Korea, Estadus Unidus Amerika, europa Comunidade Pais Lingua Portugues (CPLP).  Obrigado barak ba imi ninia esforsu.     Atu husik hela didikasaun dia katak, kontinua nakloke hodi simu  ita bo’ot  sira ninia apoiu ba imi ninia tulun,”haklaken Lere.

Iha parte seluk,  Veteranus, Agosto Tara, hatutan katak, nudar veteranus  senti orgulhu aniversario transformasaun FALINTIL ba F-FDTL.

“Ha’u senti orgulhu, tanba tinan 16 Falintil transforma ba  F-FDTL. Ha’u senti loron  ne’ebé importante, loron istoriku  ne’ebé ita komemora, ”argumenta Agosto Tara.

 Alende ne’e Veteranus,  Cornelio Gama ‘L-7’ sublinha liu tan katak, F-FDTL foin mak atinji tinan 16, ne’e duni Governu tenki kria meus para hasae liu tan  sira ninia formasaun para sai  professional liu tan hodi fo seguransa diak liu ba povu iha nasaun ne’e.

“Ami hanesan mantein fo poder ona ba F-FDTL sira, maibe ami FALINTIL mak hanesan airin nasaun ninian, tanba ami ninia sakrefisiu no sira ne’ebé mak mate mak ohin loron ita goza ukun a’an. ne’e duni agora ita tenki fo tempu para hasae liu tan sira ninia formasaun atu nune’e labele mosu tan problema hanesan krizi 2006,”afirma L-7.avi

Jornal Nacional
PARTILHAR

Author: verified_user

Publicação luso-timorense sem fins lucrativos

0 comentários: