sábado, 4 de fevereiro de 2017

PROFISAUN RELIJIOZA NU’UDAR SINAL DOMIN

PARTILHAR
Bispu Diocese Díli, Dom Virgílio do Carmo da Silva haklaken katak, profisaun relijioza nu’udar sinal domin ka aliansa entre ema ho Maromak.

Amo Bispu haklaken lia hirak ne’e iha homilia wainhira prezide misa selebrasaun votus profisaun relijiosa ba Madres na’in 4, husi Congregação Irmãs de São Paulo de Chartres (SPC), iha igreja Paroquia da Imaculada da Conceição, Balide, Díli, Kinta (02/02).

“Profisaun relijiosa hanesan sinal de enkontru ka hasoru malu entre, ida ne’ebé bolu no ida ne’ebé hatan. Tan ne’e mak sinal ida ne’e ita dehan katak sinal domin ninian. Sinal aliansa ninian hanesan ohin ita rona tiha ona katak, liuhusi profisaun ida ne’e, sira sei kesi sira nia-an ba Maromak. I segundu ne’e la’os sinal de’it maibé ida ne’e nu’udar Dom ida ne’ebé halo sira saran sira nia-an ba Maromak i saran sira nia-an ba misaun kongregasaun ninian,”haklaken Dom Virgilio do Carmo.

Bispu Diocese Díli ne’e hatutan tan katak, Dom ida ne’e mak dalabarak halo ema mós hakfodak.

“Oinsa mak ema hirak ne’e hanesan ohin ita rona sira hatan katak, sira rasik mak hakarak, laiha ema ida mak obriga, maibé sira rasik mak sente katak espíritu Maromak nian ida ne’e serbisu iha sira nia fuan laran kleur ona. Ida ne’ebé mak foin remata ninia novisiada koko atu moris ba nafatin iha dalan Maromak nian, hanesan kabe na’in sira nia promesa katak, iha susar no terus nia laran sira sei tuba metin nafatin, la’os de’it iha ksolok nia laran, maibé to’o rohan,”hatutan Dom Virgílio iha nia esplikasaun hodi refere ba promesa ka dalan vokasaun ne’ebé madre na’in 4 hili hodi servi iha Maromak to’o rohan.

Dom Virgílio haktuir katak, vokasaun ne’e hahú uluk husi Maromak, la’os ema mak ba buka Maromak, Maromak mak ida ne’ebé uluk tama iha sira nia moris i ikus mai sira hatan ba Maromak nia bolu. Liuhusi profisaun relijiosa mos halo sira atu partisipa besik liutan, moris di’ak liutan iha sira nia kompromisu batismu ninian. Iha loron batismu nian Maromak bolu ema hotu atu sai sarani, maibé iha balun ne’ebé Maromak bolu atu besik liutan ba Nia.

“Objetivu primáriu saran-an ba Maromak liuhusi profisaun ne’e atu halo saida? Balun dehan, sai madre atu nune’e bele hanorin iha eskola, sai madre atu nune’e bele hela iha konventu. Ida ne’e resposta ne’ebé ita bele dehan superfisial liu. Profisaun relijiosa nia finalidade mak fonte ba ita nia santidade. Ida ne’e mak enkontru Maromak nian hodi bolu ema ne’ebé hatan liuhusi profisaun relijiosa, konsagrasaun liuhusi profisaun relijiosa, Maromak sei konsagra sira, la’os ita maka konsagra ita nia-an, ita ne’e sé atu konsagra ita nia-an ba Maromak? Ita tau ita nia-an iha Maromak nia liman, no Maromak mak konsagra ita atu la’o iha nia grasa.”esplika Dom Virgilio.

Maibé Dom Virgilio fundamenta katak, nu’udar ema, sira iha nafatin frakeza, iha tempu ne’ebé sira forte no iha tempu mós sira fraku. Tan ne’e primeiru tenki tau-an iha Maromak, husu Maromak nia tulun. Segundu familia, belun no kolega sira mós sai sira nia belun, la’os de’it atu haksolok hamutuk ho sira iha momentu ne’ebé di’ak nian, maibé iha momentu ne’ebé sira moris iha difikuldade konaba sira nia vokasaun, buka ajuda sira liuhusi dalan ne’ebé di’ak, atu nune’e sira bele fiel nafatin.

“Ida ne’e mak hanoin dalan ida ne’ebé bele hatudu katak ita hotu hamutuk atu fó testemuñu konaba Kristu ne’ebé moris iha ita nia leet, sosiedade no rain, wainhira ita sente tebes sentidu ida ne’e, sentidu komuniaun hodi tulun malu, la’os de’it hodi orasaun, maibé mós liuhusi ita liafuan no ezemplu ba malu,”termina Dom Virgilio iha homília.

Madre Aurelia da Costa Herculanu mós hato’o agradesimentu ba familia, entidades relijiozas no ba maluk sira hotu ne’ebé apoiu ona sira atu bele hatan ba vokasaun relijiosa nian nu’udar madre atu servi nafatin iha Maromak no ba ema hotu iha vida tomak.

Madres nain 4 ne’ebé halo sira nian votus profisaun relijioza maka hanesan, Ir. Aurelia da Costa Herculano, Ir. Carmelita de Jesus da Cruz no Ir. Olga de Araújo Oliveira, ne’ebé hili dalan vokasaun nu’udar madre.ías

Jornal Nacional Diário
PARTILHAR

Author: verified_user

Publicação luso-timorense sem fins lucrativos

0 comentários: