segunda-feira, 6 de março de 2017

PM RUI APELA BA POVU, PARTISIPA KAMPAIÑA HO DIGNIDADE

PARTILHAR
Primeiru Ministru (PM), Rui Maria de Araújo apela ba povu tomak, liu-liu ba apoiantes kandidatus Prezidenti Repúblika periodu 2017-2022, atu partisipa iha atividade kampaiña eleitoral ho kalma no dignidade.

“Kampaiña ba eleisoens Prezidensiál hahú ona horseik, ita hotu-hotu hatene infelizmente mosu disturbius oituan iha Raikotu, joven sira provoka malu, ha’u hakarak hato’o  apelu ida ba populasaun tomak katak, ita tenki diginfika importánsia prosesu demokrátiku ne’ebé ita hala’o i ita nia luta atu liberta povu, tenki liu husi prosesu ida ne’ebé digñu. Tanba ne’e apela ba populasaun tomak atu liu husi kampaiña ida ne’e ho dignidade, ita la presiza uza violénsia hodi tuda malu. Provoka disturbius atu konvense ema atu vota tuir ita ka vota la tuir ita,” PM Rui hato’o nia mensajen ne’e iha konferensia imprensa iha Aeroportu Internasional Prezidenti Nicolau Lobato, Comoro, Díli, Sábadu (04/03), relasiona ho akontesementu ne’e apoiantes husi kandidatu Prezidenti sira tuda komunidade nia uma área Raikotu Sesta (03/03), ne’ebé halo estragus  ba uma 30 resin ho sasan seluk tan hetan estragus inklui ema balun hetan kanek.

“Ha’u husu ba apoiantes hotu-hotu husi kandidatu Prezidenti Republika na’in ualu (8), atu partisipa iha atividades  kampaiña eleitoral ne’e ho kalma, dignidade no hatudu maturidade ho dignidade povu ninian. Povu Timor-Leste ne’ebé ema hotu-hotu respeita, wainhira ita ba estranjeirus, halo vizitas iha nasaun sira ne’ebé belun ho ita no apoiu ita, ema hotu iha admirasaun bo’ot ho Timor-Leste. Tanba Timor-Leste hatudu husi tinan 1999 mai to’o agora ninia maturidade ne’e adopta valores demokrátikus, adopta diferensas opiniaun ho dignidade tomak, i tanba ne’e, oras ida ne’e momentu importante ida, ita hakat kampaiña eleitoral atu hili Prezidenti Repúblika, husu liu-liu juventudi sira atu komporta imi nia hahalok halo di’ak,” hatete Xefi Governu ne’e.

Xefi Governu ne’e dehan tan, wainhira imi uza violénsia, atu halo provokasaun forsas ordem seguransa sei atua, i buat hotu-hotu ne’ebé relasionadu ho krimi, forsa ordem seguransa hamutuk ho operadores justisa sira sei foti medidas.

“Ita la presiza ba to’o iha ne’ebá, tanba  loloos ne’e hanesan hotu-hotu temi  iha públiku katak, eleisaun ne’e festa demokrasia nune’e wainhira festa ne’e halo ita atu haksolok, la’os ita atu sadik no tuda malu. Tan ne’e dala ida tan husu ba apoiantes husi kandidatu prezidenti nain ualu (8) ninian atu komporta ho didi’ak iha prosesu kampaiña eleitoral ne’ebé sei hala’o to’o iha loron 17 semana oin. Husu mós ba lideres ka kordenadores, ka responsaveis kampaiña eleitorais hotu atu apela ba  militantes hotu-hotu atu labele hamosu komportamentu ka, atetude ka oportunidade atu apoiantes husi kandidatu ida ho kandidatu seluk atu bele sadik malu depois bele tama iha violénsia,” Rui hatete.

Rui dehan tan, klaru ke PNTL hanesan instituisaun seguransa iha mandatu legál, konstitusional atu atua wainhira iha disturbius ruma, foti medidas tuir buat ne’ebé lei defini ona.

Kandidatu Prezidenti Repúblika na’in 8 ne’ebé oras ne’e dadaun hala’o ona kampaiña iha territóriu no atu kompete iha eleisaun prezidensiál 20 Marsu 2017, mak hanesan, António Maher Lopez (Fatuk Mutin), Francisco Guterres ‘Lu-Olo’, Amorin Vieira, José de Jesus das Neves “Sama-Larua”, José Luis Guterres, Maria Ângela Freitas, Luis Alves Tilman, António da Conceição “Kalohan”.des

Jornal Nacional Diário
PARTILHAR

Author: verified_user

Publicação luso-timorense sem fins lucrativos

0 comentários: