Washington kondena lansamentu mísseil hosi Koreia do Norte

Washington iha ohin kondena lansamentu mísseil balístiku haat hosi Koreia do Norte, no promete "sei uza meius hotu " tuir  alkanse " hasoru  ameasa maka’as " norte-koreanu nian.

"Estadus Unidus kondena tebes lansamentu mísseil balístiku hosi  Koreia do Norte, ne’ebé viola rezolusaun Konsellu Seguransa Nasoins Unidas", haktuir  portavós Departamentu Estadu, Mark Toner, iha komunikadu.

Koreia do Norte iha ohin lansa mísseil barak ba tasi, iha kosta leste nasaun nian, anunsia responsável militar Koreia do Sul.

Primeiru-ministru japonés, Shinzo Abe, hatete katak tolu hos mísseil haat ne’ebé Koreia do Norte lansaiha ohin monu iha bee ne’ebé kontrola hosi  Japaun,  no kondena moos asaun Pyongyang nian.

Xefe estadu-maior forsa armada Koreia do Sul haktuir iha ohin liuhosi komunikadu katak lansamentu hala’o iha  zona Tongchang-ri,  provínsia Pyongan Norte. Zona ne’e maka sai baze estasaun ba lansamentu satélite Seohae, ne’ebé maka  Koreia do Norte, iha tinan hirak ikus ne’e, halo lansamentu mísseil ho alkanse dook.

Lansamentu mísseil hosi Koreia do Norte  ne’e mosu loron hirak hafoin Estadus Unidus no Koreia do Sul realiza ezersísiu militar ne’ebé tuir  Pyongyang hanesan ensaiu invazaun ida.

SAPO TL ho Lusa