Kontratu ba Funsionariu Kontratadu iha Palásiu Prezidensiál

DILI, (TATOLI) – Prezidente eleitu, Francisco Guterres Lú-Olo haruka ona karta ba Prezidente sesante, Taur Matan Ruak hodi hanaruk kontratu ba funsionariu kontratadu iha Palásiu Prezidensiál to’o agostu 2017.

“Karta prezidente eleitu mai husu ba prezidente atuál atu prolonga kontratu ba fulan tolu nomos lista foun husi Prezidente eleitu foun, tanba ne’e maka oras ne’e ami prepara hela kontratu”, dehan Xefe Casa Sivíl, Rui Gomes ba TATOLI iha Palásiu Prezidensiál Bairo-Pite Dili.

Tuir lolos funsionariu hotu sei termina kontratu iha loron 20 maiu 2017, maibé tenke extende to’o loron 31 fulan agostu 2017.

Funsionariu sira ne’e mak moradór ema 36 husi sekretariadu, gabinete Prezidente Republika, protolu, IT ( Information and Technology), finansas no asesór balun hamutuk ema 15. Enkuantu, lista funsionariu nomeasaun polítika ne’ebé sei servisu hamutuk ema nain 19.

Entretantu, karta pedidu ne’e haruka iha loron 16 foin lalais ne’e.

Jornalista: Agapito dos Santos | Editora: Rita Almeida

Foto: Prezidente eleitu, Francisco Guterres Lu-Olo ho Prezidente sesante, Taur Matan Ruak hasoru malu iha Palásiu Prezidensiál foin lalais ne'e. Foto espesiál