quarta-feira, 3 de maio de 2017

Xanana kontinua nu'udar prezidente hosi partidu boot Timor-Leste, Kalbuadi eleitu sekretáriu-jeral

PARTILHAR
Xanana Gusmão mantén iha prezidénsia hosi Congresso Nacional da Reconstrucao Timorense (CNRT), laiha dezafiu ruma ba nia lideransa, no Francisco Kalbuadi eleitu ona nu'udar sekretáriu-jeral, halakon lista ne'ebé lidera hosi antigu sekretáriu-jeral, Dionísio Babo.

Ba kargu sekretáriu-jeral aprezenta lista tolu, no Francisco Kalbuadi, ne'ebé uluk nu'udar prezidente hosi Komisaun Diretivu Nasional, eleitu ho votu 531 kontra votu 195 ne'ebé hetan hosi antigu sekretáriu-jeral, Dionísio Babo, no votu 188 ne'ebé hetan hosi atual prezidente Parlamentu Nasional nian, Adérito Hugo da Costa.

Kalbuadi, atual ministru Turizmu, Arte ho Kultura, iha ligasaun hela ba prosesu investigasaun balun iha Timor-Leste ho imprensa timoroan fó sai notísia iha fulan-Outubru tinan liubá katak Tribunal Distrital Díli nian investiga hela kona-ba iregularidade sira iha finansiamentu ba partidu iha tinan 2012.

Sekretáriu-jeral foun hosi partidu boot timoroan nian envolve mós iha polémika seluk kona-ba futebol timoroan nian no internasional.

Prezidente hosi Federasaun Futebol Timor-Leste nian, Kalbualdi envolve ona iha polémika kona-ba subornu ne'ebé deskonfia halo hosi Mohamed Bin Hammam, hosi Qatar, hodi bele lori nasaun ne'e ba Mundial.

Auditoria ida hosi PWC kona-ba CAF no konta sira hosi Hamman indika katak karik fó ona dolar rihun 50 ba Kalbuadi Lay ba "gastu pesoal sira".

Foin lalais ne'e FIFA ho Konfederasaun Aziátiku Futebol nian suspende ona FFTL tanba uza jogador brazileiru sira na'in 12 ho dokumentu falsu sira ne'ebé hatete katak sira hanesan ema timoroan.

Iha votasaun CNRT nian iha loron-segunda, lista B, ne'ebé hanesan vensedora, inklui eleisaun ba visi-prezidente sira hanesan hosi António da Costa (Mau Huno), Virgílio Smith, Maria Rosa da Câmara, Tomás Cabral, Bendito Freitas ho Francisco da Costa.

Ba kargu visi-sekretáriu-jeral sira maka hili ona Jacinto Rigoberto de Deus, Francisco Guterres ho Jacinto Viegas.

Entre sira ne'ebé maka lakon iha lista sira seluk iha lista A ne'ebé lidera hosi Adérito Hugo da Costa, atual ministru Estadu nian no porta-vós hosi Governu, Agio Pereira, no xefe hosi bankada CNRT iha Parlamentu Nasional, Natalino dos Santos.

Votasaun hala'o to'o loron-segunda madrugada hafoin debate naruk ne'ebé hahú hosi loron-sesta no ne'ebé inklui ona mudansa sira ba estatutu sira hodi permiti releisaun hosi kuadru dirijente sira.

SAPO TL ho Lusa | Foto@ António Amaral/Arquivo Lusa
PARTILHAR

Author: verified_user

Publicação luso-timorense sem fins lucrativos

0 comentários: