PN Preokupa, Konsumu Sigaru Eletroniku

DILI – Deputadu iha uma Fukun Parlamentu Nasional preokupa ho sigaru eletroniku, neebe oras nee dadaun sirkula iha Timor Leste (TL), halo estudante pre-sekundaria sira mos konsumu hotu.

Preokupasaun nee hatoo husi Deputadu husi Bancada PD Adriano do Nascimento katak, koalia nee bazeia ba nia oan feto mak haree kolega eskola fuma iha sira nia eskola, labarik sira foin SMP deit fuma ona sigaru nee.

“Hau preokupa tebes tanba sigaru nee dehan katak Xina mak faan, neebe husu ba governu atu haree no toma atensaun hodi prende buat nee,” katak Adriano iha sesaun Plenaria Segunda (12/06/2017) iha Parlamentu Nasional.

Nia hatete, sigaru eletronik nee nia oan rasik mos hakfodak hodi husu, agora iha ona sigaru eletronik halo sidadaun barak mak konsumu, inklui  labarik estudante mos konsumu, nee tenke haree ema neebe mak faan sigaru eletronik nee iha Timor hodi atua.

Nunee mos joventude Audian, Melkianos Nahak hatete, kona ba sigaru eletronik nee nia mos haree bei-beik ema barak fuma ona, maibe ba nia pessoal seidauk koko, tanba nia mos tauk keta halo ba aban bainrua iha efek sampin fali ita nia saude,”katak nia.

Tuir nia katak, ema neebe mak faan sigaru nee, nia parte lahatene, neebe husu ba governu karik haree ida nee mak ladiak tenke prevene antes kedas, atu nunee sidadaun sira hapara ona fuma sigaru eletronik nee.

Aleinde ne observasaun Jornalista haree iha terenu katak, iha joven barak mak konsumu ona sigaru eletronik nee, sigaru nee rasik bainhira fuma too nia enerjia sigaru nian hotu karega, tiha mak foin bele fuma, i haree sigaru nee mos joven sira fuma join ba malu deit. Guilhermina Franco / Jacinta Sequeira

Suara Timor Lorosae