Caero Tama Prizaun Tinan 3

DILI - Eis Sekretariu Estadu Obras Publiku, Domingos  dos Santos Caero no  Eis Diretor Jose Agusto Inglesh dos Santos Freitas tama  ona prizaun Becora. Depois desizaun tribunal hetan penatinan 3 fulan 6, noselu indimizasaun ba estadu.

Domingos dos Santos Caeiro selu indiminizasaun U$ 200.00, no Jose Agusto Inglesh dos Santos selu U$ 150.00 ba estadu. Tanba provadu komete krime administrasaun danoza neebe previstu iha artigu 274 kodigu penal TL.

"Los duni Domingos dos Santos Caero ho nia Diretor Jose Agustinho Freitas tama prizaun iha tuku 3:20 horseik. Konaba la foti sira nia figura, nee direitu husi sidadaun hotu hotu. Kuandu atu foti foto lakohi fo, maibe hanesan reprezenta instituisaun ida,  jestor iha nee konfirma ba kondenadu nain  tama ona maibe la sai iha media. Ami informa sira tama ona, bazeia ba mandadu de tribunal,” informa Diretor Prizaun Becora, Joao Domingos ba Jornalista sira iha Prizaun Becora, Segunda, (25/09/2017).

Nia sublina, kondenadu nain rua tama ho kazu administrasaun danoza, ho pena tinan tolu fulan neen mai husi Tribunal Distrital Suai. Bazea ba mandadu neebe iha, nia kumpri aprezenta aan ba tribunal, no polisia hodi mai iha prizaun. Nunee kondenadu koopera ho parte justisa, no seguransa no kumpri mandadu. No husi tribunal ofisial justisa sira ba foti, hodi mai iha prizaun.

Antes nee, desizaun husi tribunal rekursu absolve arguidos Domingosdos Santos Caeiro,  no Jose Agusto Inglesh dos Santos Freitas, neebe komete krime, abuzu de poder, partesipasaun ekonomika no negosiu, iha artigu 421  no lei 31/1999 Republika Indonezia, iha data no faktus, neebe aktualmente iha artigu 297 no 299 iha kodigu penal Timor Leste nian.

Nunee absolve arguido Jose Agusto Inglesh Freitas ba krime falsifikasaun dokumentos notasaun teknika, husi artigu 264 iha kodigu penal neebe iha.

Antes nee, Iha loron 3 fulan junu tinan 2015, realiza audensia julgamentu kolektivu iha tribunal Suai, tribunal koletivu solisita menisteriu publiku, no defensor publiku Suai atu aprezenta peritus atu analiza dokumentus ba prokurador ba krime abuju poder, husi Arguido Domingos Dos Santos Caeiro no Jose Agusto Inglesh Dos Santos Freitas.

Audensia julgamentu ba krime nee, jusi Maria Natersia Gusmao Pereira prezide husi majestradu/ advogado Antonio Tavares Da Silva, Octavio Antonio Caldas Cardoso. 

Terezinha De Deus | Suara Timor Lorosae