Komandu PNTL Labele Tolera Kriminozu, Laos Grupu Deskonesidu

DILI  - Reprezentante povu iha uma fukun Parlamentu Nasional (PN) preokupa tebes kazu ataka membru Polisia Nasional Timor Leste (PNTL) unidade  BOP (Batellaun Ordem Publik) iha Bekora foin lalais nee. No husu komandu Jeral PNTL atu labele tolera ema kriminozu.

Deputadu Natalino dos Santos, husi bankada CNRT dehan triste tebes sidadaun Timor oan ataka fali polisia, tan nee presiza halo investigasaun hodi hatene motivu husi kazu nee nian.

“Presiza reforsa destaka tan polisia ba iha suku-suku, i movimentu patroliamentu nee tenke rutina,” dehan Deputadu Natalino ba STL Kuarta (27/09/2017) iha PN.

Deputadu CNRT nee hatutan hahalok sira akontese tanba konsensia sidadaun nian atu kontribui ba dezenvolvimentu nasaun nian minimu. Tan nee presiza halo investigasaun hodi hatenesa motivu husi akontesementu nee.

“Bele problema privadu ou iha mos motivu seluk, maibe hau fiar katak PNTL sei halo investigasaun klean ba kazu ida nee. Husu komandu PNTL atu labele tolera ema kriminozu sira hanesan nee, tanba  hahalok sira hanesan nee bele afeta ba estabilidade nasaun,” Natalino apelu ba Timor oan,  liu-liu joventude sira atu kontribui ba paz no hakmatek, tanba Timor oan  nee ema ida deit, tenke kaer metin nafatin hahalok joventude loriku asuwain sira nian neebe uluk kontribui ba libertasaun nasaional.

Joven agora tuir Natalino tenke banati tuir juventude loriku asuwain, nunee labele estraga estabilidade iha rai laran. Polisia tuirnia tenke mantein ordem ho lei, inklui autoridade lokal sira atu kontribui reforsa servisu seguransa, paz no estabilidade.

Natalino relata Nuudar Timor oan tenke orgullu tanba ohin loron nasaun indenpendente tenke kontribui, karik iha problema privadu tenke buka rezolve ho diak, labale halimar ho krime.

Entretantu Prezidente Komisaun B Parlamentu Nasional, Fidelis Magalhaes dehan haree ba asuntu nee komisaun B sei konvoka audensiaida ho komandu PNTL atu hatene klean motivu kazu nee nian.

Fidelis konsidera kazu ataka membru BOP bele fo mos impaktu ba estabilidade governu neebe seidauk forma kompletu, maske nia lakohi ezozera sasan, iha fatin hotu-hotu sempre mosu krime, maibe laharee ligasaun direta entre kazu nee ho formasaun governu.

“Hau nia pontu devista kazu nee akontese laiha ligasaun ho estabilidade seguransa nasional, tanba estabilidade nee iha povu hotu nia liman no partidu hotu nia liman, tanba nee ita haree povu ho partidu hotu hakarak moris iha paz no hakmatek, inklui instituisaun estadu sira hakarak   moris hakmatek,” komenta Fidelis.

Laos Grupu Deskonesidu

Entretantu Xefi Suku Bacora, Antonio da Silva Soares dehan kazu  ataka membru Polisia Nasional Timor Leste (PNTL), Tersa (26/9/2017) kalan iha uma tempurariu UNITAL Becora Dili, laos grupu deskonesidu, maibe  iha suspeitu nain rua maun alin dadaun detein ona iha Postu PNTL Kristu-Rei.

“Suspeitu laos ema deskonesidu, sira hela hamutuk ho BOP iha uma tempurariu UNITAL hanesan kolega ou bijinu mak ataka malu, nunee suspeitu nain rua agora detein iha estasaun Polisia Kritu-Rei nian,” dehan Antonio ba STL iha Becora Kuarta (27/9/2017).

Tuir Xefi Suku Becora nee vitima husi BOP nee dadaun halo hela tratamentus iha Hospital Nasional Guidu Valedares (HNGV), tanba hetan kanek iha kabas,  ida seluk kanek todan iha kabas no rins ou konotak.

Tuir informasaun kazu nee mos deskonfia iha festa sira (suspeitu ho vitima) hemu tua hamutukhamosu problema, informasaun deit. La haree ho matan, “Prosesu investigasaun mak bele hatenee lolos kronologia akontesementu nee, tanba bainhira laiha asaun mak laiha reasaun,” tenik Antonia.

Xefi Suku Becora nee husu governu atu muda sai komunidade sira neebe okupa ou hela iha uma tempuraiu UNITAL no komunidade sira neebe hela iha Merkadu Becora hodi labele mosu problema.

Tuir Xefe Emerjensia HNGV, Nilton do Carmo da Silva, pasiente nain rua iha segunda kalan s tuku 11.30 tama iha HNGV hodi halo tratamentu. Nunee ekipa simu pasente nain rua nee iha kalan tuku 11.30 tama iha sala emerjensia hodi halo tratamentu ba pasiente neebe kabas ruin tohar.

Guilhermina F/Jacinta S/Augusto da Costa | Suara Timor Lorosae