Indonézia prepara nia aeroportu sira hasoru posibilidade erupsaun vulkaun iha Bali

Ministériu Transporte Indonézia nian hatete iha loron-tersa ne'e katak aeroportu sanulu iha nasaun ne'e prepara hela hodi sai hanesan alternativu bainhira taka aeroportu iha illa Bali, bainhira vulkaun Agung hahú erupsaun.

"Aeroportu sanulu sei serve hanesan alternativu sira ba aviaun sira ne'ebé uza dalan ba aeroportu Ngurah Rai (iha Bali), bainhira aeroportu ne'e taka tanba impaktu hosi sinza vulkániku hosi Agung", hatete hosi ministru Transporte, Budi Karya Sumadi, iha komunikadu.

Sumadi indika ona katak karik besik pasajeiru rihun lima maka sei afetadu bainhira vulkaun tama iha erupsaun. Sira sei haruka ba sidade sira hanesan Jakarta, Makasar, Surabaya, Balikpapan, Solo, Ambon, Manado, Praya, Kupang ho Banyuwangi.

Ministériu Transporte nian prepara mós autokarru hamutuk 100 hodi lori pasajeiru sira hosi Bali ba Banyuwangi, Surabaya (sidade rua ne'e situa iha Java Oriental) no Praya (iha illa Lombok iha Nusa Tenggara Osidental) ho ajuda hosi ró sira.

Ajénsia Nasional ba Jestaun Dezastre nian (BNPB) aumenta ona alerta erupsaun hosi vulkaun Agung iha loron-sesta ba nível 4, nível máximu, no hafoin aumentu beibeik hosi atividade vulkániku ne'ebé iha loron-tersa hatete katak vulkaun iha hela "faze krítiku" ida.

Red Cross indonéziu nian aumenta ona, iha loron-kuarta ne'e, númeru hosi ema deslokadu sira hosi zona seguransa vulkaun nian, ne'ebé aumenta iha kilómetru sia to'o kilómetru 12 haleu kratera, ba ema rihun 81 resin, ne'ebé distribui liuhosi fatin 370 iha distritu sira iha illa ne'e.

Autoridade lokal sira afirma ona katak turista sira sei la hetan perigu bainhira la tama iha zona seguransa nian no aeroportu internasional Bali nian, Ngurah Rai, kontinua halo operasaun hanesan baibain.

BNPB hatete ona iha loron-kinta liubá katak nakdoko ne'ebé maka verifika nafatin hanesan ho nakdoko sira ne'ebé akontese iha tempu uluk bainhira foho Agung tama iha erupsaun iha tinan 1963, ne'ebé akontese to'o kuaze tinan ida nia laran no halo ema na'in 1.100 resin mate.

Bali hanesan destinu turístiku prinsipal hosi Indonézia, ho entrada mensal ba turista estranjeiru hamutuk rihun 200 resin, haktuir hosi informasaun ofisial sira, maski alerta hosi erupsaun ne'e halo atu turista balun kansela sira nia viajen ka muda destinu viajen nian.

Arkipélagu Indonézia nian ne'e situa iha "Ring of Fire" hosi Pasífiku, zona ida ho atividade sísmiku no vulkániku maka'as ne'ebé maka bele akontese nakdoko rihun resin tinan-tinan, barak liu ho magnitude ki'ik.

SAPO TL ho Lusa | Foto@ Made Nagi /EPA