Misaun Kuaje Kumprida: Parabéns Asuwa’in Kay Rala Xanana Gusmão!

Roger Rafael Soares * | opiniaun

“Viva Timor-Leste”  expresaun ne′ebé Xanana Gusmão uza bebeik, durante procesu históriku naruk iha autodeterminasaun ba ita nia rain. La trata deit nudar simples fraje ida. Maibé, fraje ne′ebé nakonu ho firmeza no determinasaun, husi expresaun ida ne′ebé nakonu ho emosaun bo′ot, sentidu nasionalista, dejezu ne′ebé inkansável atu alkansa direitu ba Timor Leste, konsekuentemente, paz ba ninia povu. 

Alkansada ona etapa ida husi mehi Xanana Gusmão nian, Timor Leste hetan independénsia no sai ona nudar Nasaun soberana ida iha mundu. Maibé figura no lideransa Xanana Gusmão nian, iha procesu ba Konstrusaun Estadu no Nasaun Timor Leste, sei nafatin inkontornável no desijivu durante tinan barak iha Prosesu ne’e rasik. 

Xanana Gusmão nia mehi agrega objektivu prinsipal rua: hetan ukun rasik an ba Timor Leste, ne′ebé rekoñesidu, internasionalmente, iha loron 20, fulan Maiu, tinan 2002. Dezde momentu ne′eba persiste objektivu segundu, dezenvolvimentu nasional, ne′ebé proporciona ba povu tomak, ho forma ne′ebé justa no hanesan, acesu ne′ebé permite vivencia hodi hetan moris diak ho dignidade no kualidade, iha teritóriu Timor laran tomak. Maibé dezenvolvimentu nasional la bele alkansa, wainhira seidauk atinji independénsia total ba soberania nasional liu husi delimitasaun ba fronteiras entre Timor Leste ho nia rai viziñu sira. Xanana Gusmão hatudu dala ida tan, liu husi Ninia inkansável luta no dedikasaun máxima, konsege ho forma elegante, dala ita tan, halo istória ba ita nia rain, liu husi konkluzaun ba definisaun fronteira tasi laran ho nasaun viziña Austrália, no kosege marku históriku admirável iha prosesu delimitasaun fronteira rai maran kuaze konkluídu ho nasaun viziña seluk, Indonésia. 

Iha kada momentu históriku Timor Leste nian, Xanana Gusmão sempre hatene, ho forma ne′ebé diak no elegante tebes, mobiliza no haforsa unidade nasional, ne′ebé sai nudar motor aranke importante no principal hodi implementa metas no objetivu husi Nasaun no husi Povu.  

Durante procesu dezenvolvimentu nasional, Xanana Gusmão mos sempre proporsiona, ho empeñu ne′ebé bo’ot no maka′as hodi arketekta no hadia sistema Nasaun nian, ne′ebé sai nudar aliserce importante, no mos meius esenciais ba funsionamentu diak husi sistema demokrátiku no seguransa, atu nune′e bele fo solusaun adekuada ba problemas sociais no ekonómikus ne′ebé Nasaun no Povo hasoru. 

Iha momentu rejisténsia Xanana Gusmão konta ho partisipasaun povu nian, ohin loron mos, alkansadu tiha ona ukun rasik an, Xanana Gusmão konta nafatin ho povu nia partisipasaun iha rocesu konstrusaun Estadu-Nasaun, ne′ebé koinside tebes ho lema ne′ebé Nia rasik maka designa “ Libertada a Pátria e libertemos o Povo”, projetu bo’ot ida ne′ebé exije empeñu, dedikasaun no esforsu atu humutuk ida deit ho povu, hodi fo kontinuidade ba implementasaun Planu Estratejiku Dezenvolvimentu Nasional, iha ne′ebé reflete aspirasaun no mehi husi timor ona tomak nian, hodi moris iha prosperiedade nia laran.

Ohin, Xanana Gusmão hakerek tan istória foun iha procesu konstrusaun Estadu−Nasaun: Vitória ba Delimitasaun Fronteira Marítima ho ita nia Nasaun viziña, kadoras dada mai Timor Leste − vitórias ne′ebé komprova esforsu no sakrefisiu Xanana Gusmão nian hodi luta atu hasai povu timor tomak husi kiak no mukit nia laran. 

Ohin mos públiku apresia no admira ba Xanana Gusmao, nudar figura polítika destakada iha país, nunka falha iha Ninia kompromísu polítiku ho nia povu no nia rain, sein iha intensaun atu uza alkansus hirak ne’e ba proveitu ba Ninia Partidu, nein ba Nia an rasik. Polítiku sériu no responsável ne′ebé kumpri promesa sira sein reserva, promesas ne′ebé Nia promete duranta kampaña eleitoral. Nune′e, hamutuk ho Xanana Gusmão, ita loke kapítulu foun iha prosesu konsolidasaun Estadu−Nasaun, prosesu  ne′ebé hatur iha konkretizasaun ba mehi sira: mehi atu lori dezenvolvimentu humanu no fíziku ba ita nia rain, mehi atu muda povu nia moris, liu husi kriasaun kampu servisu ba joven sira, mehi atu moderniza ita nia rain. Mehi ita hotu nian!

Parabéns Asuwa’in Kay Rala Xanana Gusmão! 

Rojer Rafael T. Soares

Ailiili, Manatuto

rrtsoares@hotmaill.co

Nota TA:

Artigo de Roger Rafael T. Soares datado de 30.07.2019 e que só agora tivemos possibilidade de o publicar no Timor Agora, pelo facto apresentamos a nossas desculpas ao autor e aos leitores que fielmente nos acompanham apesar das intermitências das atualizações devidas, mas em falta, no TA. Com otimismo contamos a breve prazo normalizar o ritmo quotidiano de publicação no Timor Agora.