LONGUINHOS AKTUALIZA SERVISU IMIGRASAUN

Ministru Interior Longuinhos Monteiro aktualiza situasaun seguransa Timor laran tomak ba Primeiru Ministru (PM) Rui Maria de Araújo, li-liu servisu imigrasaun nian ne’ebé la’o durante ne’e.

“Ha’u mai aktualiza situasaun seguransa pais ninian ba Primeiru Ministru, iha área servisu imigrasaun, polisia ninian, bombeiros, diresaun nasional, seguransa patrimonio públiku,”dehan Longuinhos Monteiro ba jornalista sira iha Palacio Governu, Segunda (03/8) hafoin hasoru malu ho PM Rui Araújo.

Longuinhos dehan, ida ne’e hanesan atividades rutinas, kada semana ida, nia sempre update informasaun ba Primeiru Ministru Rui Maria de Araújo kona-ba seguransa rai laran.

Eis Komandante Jeral Polisia Nasional Timor Leste ne’e haktuir, situasaun iha teritoriu Timor laran tomak agora la’o hakmatek, maske iha problema ki’ik oan balu.

Alende ne’e, Longuinhos mós informa katak, kona-ba membru Polisia Nasional Timor Leste, Rojalino ne’ebé uluk hetan tiru husi grupu Alfredo Reinaldo iha tinan 2006, to’o agora Estadu kontinua fó asistensia ba nia.

“Ha’u sei koalia ho Komandante Jeral PNTL atu haree tok ida ne’e fali, ha’u hatene katak, uluk iha asistensia balu ba iha ninia situasaun,”relata Longuinhos.

Nia dehan, hafoin membru Polisia Rojalino hetan asidente ne’e, Estadu liu husi Komando PNTL fó ona asistensia barak ba nia. Maibé Longuinhos dehan, nia sei update kondisaun membru PNTL ne’e husi Komandante Jeral PNTL.

“La’os dehan apoiu ne’e laiha, la’e, soke depois nia kauza moras ne’e mai iha oin, Komando tenke mós informadu para ita bele follow up, sela’e ita nonok hotu deit, depois derpente mosu hanesan ne’e, ita dehan sala se mak los,”katak nia.

Longuinhos dehan, nia fiar katak, Komando sei haree kestaun ida ne’e, hodi rezolve membru PNTL ne’e nia situasaun.cos

Jornal Nacional