Traballador Infantil sai ona Tradisaun, Defisil Hakotu

DILI - Ministru Estadu Koordenador ba Asuntu Ekonomia no Ministru Agrikultura no Peskas (MKAE), Estanislau Aleixo da Silva deklara, deficil atu governu bele hakotu traballador infantil iha rai laran tanba ne’e sai tiha ona hanesan tradisaun ida ba ema Timor-oan sira. 

              

“Traballu infantil buat ida ke importante, mas ida ne’e ita tenki hare diak tanba ita nia rai ne’e iha tradisaun iha foho ne’eba, labarik sira mós ajuda inan aman, ne’e la’os obriga para labarik sira halo servisu, ida ne’e sala, obriga sira labele, mais ita tenki haree mós ba povu nia moris ne’e. Dalabarak ita koalia ne’e tenki hakotu traballu infantil, mais hakotu ne’e la’os fasil, iha aspeito kulturais, iha aspeitu ekonomikus,”hatete Ministru Estanislau iha edifisiu MAP Komoro, Segunda (3/08).

Nia fó ezemplu, iha uma kain ida ne’ebé inan ho aman ferik hotu ona, laiha kbi’it para halo servisu maka’as, nune’e labarik sira ne’e servisu hodi ajuda sira nia familia.

“Obriga labarik servisu, rekruta labarik sira ba servisu iha fabrika, iha fatin-fatin sira ne’e, ida ne’e ita viola ona konvensaun nian,”nia esplika.

Atu haree labarik sira nia moris, Ministru dehan, governu tenki kria kondisaun, maibé ida ne’e sei lori tempu no Sekretariu Estado Politika Fórmasaun Profesional Empregu (SEPOFPE) tenke esforsu maka’as.

Antes ne’e, Inspector Geral no Presidente CNTI, Aniceto Leto Soro informa kona-ba traballador infantil seidauk halo kontrolu masimu tanba seidauk iha lei kona-ba traballador infantil nian.

Kona-ba total traballadores infantil ne’ebé oras ne’e dadauk eziste iha nasaun ne’e, Aniceto afirma, seidauk halo kontrolu masimu tanba Timor-Leste sei falta lei ne’ebé atu koalia no regula kona-ba traballadores infantil sira.

“Ita seidauk iha lei espesifiku ida kona-ba traballo infantil. Agora prosesu ita la’o hela liu husi Komisaun Nasional Traballo Infantil. Ita kria ona komisaun ida ne’e í komisaun ida ne’e halo tiha ona lista ou dekretu lei ida ba traballo perigosu ba labarik sira, ne’ebé kuandu lista ne’e hotu ona, inspektor sira fasil halo kontrola hodi bandu fase kareta ne’e labele, í agora ita seidauk hatene fase kareta ne’e bele ka labele, ita seidauk iha lei ida determina ba asuntu espesifiku ba ida ne’e, tanba ne’e maka ita só halo kontrolu fó sujestaun ba labarik sira ne’e para atu ba eskola,”katak nia.

Total traballadores infantil nian, Aniceto dehan, IGT labele hetan númeru lolos, tanba iha mudansa hosi loron ba loron.

 “Ohin ita ba hetan númeru hanesan ne’e, aban ita ba fali hetan númeru hanesan ne’e, ne’ebé ita laiha númeru ida ne’ebé maka lós ba ema sira ne’ebé serivu, liu-liu ba alin sira ne’ebé ita konsidera serivu ki’ik,”nia realsa.

Oras ne’e dadauk, koordenasaun servisu entre SEPFOPE ho Servisu Migrasaun kontinua la’o hodi halo kontrolu ba ema estranjeiru sira ne’ebé uza sala vistu.

 “Ita servisu hamutuk hela, agora iha planu atu halo operasaun konjunta ba munísipiu sira iha teritoriu nasionál Timor-Leste hodi identifika ema sira ne’ebé maka uza vistu turista,”tenik nia. (jos)

Timor Post