LEI IMIGRASAUN LAIHA VALOR…!!!

Jornal Nacional, editorial

Dirasaun Imigrasaun Timor Leste durante nee lakon kontrola ema estanjeirus nebe tama mai Timor Leste hodi nunee sidadaun estranjeiru sira nee fasilmente viola lei imigrasaun nebe aplika iha rai doben ida nee.

Antes nee publiku liu husi media nasionais halo kritika maakas ba dirasaun imigrasaun hodi konsidera imigrasaun mak fasilita prostituta tama mai timor leste hodi halo aktividade prostituisaun.

Kritika publiku nian nee seidauk lakon, mosu tan erru nebe imigrasaun komete tamba lakontrola ema estranjeirus uza vistu turista tama mai timor hodi halao fali aktividade negosiu hanesan fali vistu servisu nian.

“Ita hare tuir prosedementu lei, kuandu bainhira sidadaun estranjeirus ida mai atu halo aktividade ida, no manan osan ba nia an rasik, ne’e tenki tuir base legal, base legal maka saida base legal mak tenki trata vistu trabalho tanba sira ho vistu turista sei la bele halo aktividade hanesan servisu no manan osan ba sira nia an rasik,” Vicente Gusmão.

Lei Imigrasaun Timor Leste nian no.9/2003 artigu 5 hatete, sidadaun estranjeirus tama iha Timor Leste, hirak ne’ebe halo aktividade iha Timor Leste hodi hetan osan no benefisia ba nia an tenke hetan vistu trabalho.

Agora ema estranjeiru sira nee kumpri duni lei nee ka lae? dirasaun Imigrasaun rasik implementa lei nee ho lolos ka lae? sei dirasaun imigrasaun rasik la implementa lei nee lolos, la halo kontrola didiak ema sira tama mai timor, nee uportunidade nee ema aproveita hodi viola lei nee.

Polimika foun ohin loron nee trio Garuda Muda Indonesia nian nebe Klube Karketu Dili kontrata hodi joga iha Liga Futebol Amadora uza vistu turista tama mai hodi joga reforsa Kulbe Karketu Dili nee viola vistu no viola lei imgirasaun nebe iha Timor Leste.

Agora fila fali ba konsistensia autor ka dirasaun imigrasaun hodi ezekuta lei nee. ema estranjeiru sira seluk wainhira viola vistu no lei imigrasaun nian, dirasaun imigrasaun halo kedas atuasaun hodi deporta ba sira nia rain.

Agora oinsa ho jogador nain tolu indonesia nian nebe joga iha kulbe Karketu Dili nee? husik deit nunee ka tenki kona multa depois deporta ba fali indonesia? Se la fo multa no la deporta, nee injustisa boot ida.

Ema estranjeirus balun halo servisu ilegal, uza vistu turista depois halo servisu fali iha timor nee deit kaptura oinsa jogador naran boot iha indonesia tama mai timor uza vistu turista depois mai joga fali iha Kulbu hetan osan la halo atuasaun.

Ne’ebe hakarak ka lakohi, simu ka lasimu realidade publiku hatene ona, publiku akompanha hela, agora fila fali ba orgaun kompetente, hakarak halo atuasaun ka husik sira viola lei nebe vigora?

Se ema sira nee ita husik sira viola lei imigrasaun oinsa ema seluk labele viola lei nee. failansu nee laos kulpa jogador sira nee, laos kulpa ema estranjeirus, nee kulpa dirasaun imigrasaun rasik, lahatene duni ka finzi lahatene. Dadaun nee Publiku hein oinsa atuasaun imigrasaun nian ba trio gardua muda nee, multa ka lae, deporta ka ladeporta. *