PR TAUR HUSU JOKOWI APOIA TL TAMA ASEAN

Xefi Estadu Timor Leste (TL) Taur Matan Ruak, husu ba Prezidenti Repúblika Indonesia (RI), Joko Widodo (Jokowi) atu apoia pedidu Timor Leste (TL) nian hodi tama ba Association of South East Asian Nation (ASEAN).

Taur Matan Ruak hateten, TL kontinua prepara-an ativamente atu tama ba ASEAN, nu’udar asosiasaun ida ne’ebé desde nia kriasaun sai tiha ona fatór ida ba estabilidade no dezenvolvimentu ekonómiku.

“Ha’u hakarak hato’o ba ita bo’ot Señor Prezidenti Jokowi, rekoñesementu husi apoiu maka’as husi Indonesia, ba ami nia pedidu atu tama ba ASEAN,” dehan Taur Matan Ruak iha nia intervensaun, hafoin enkontru ho PR Joko Widodo iha Palácio Prezidensiál Aitarak Laran Dili, Tersa (26/01).

Xefi Estadu ne’e dehan, TL partisipa regularmente iha tinan barak, iha inisiativa importante sira iha âmbitu ba asosiasaun ida ne’e, no adezaun plena sei sai pasu foun ida iha prosesu integrasaun nasaun ida ne’e nian, iha aspeitu hot-hotu ba rejiaun nia moris.

“Ami harii no konsolida paz, ami harii Estadu, no ami investe dau-daun iha kriasaun ba baze dezenvolvimentu ekonómiku ida ne’ebé sustentável. Ami diriji tiha ona esforsu sira atu iha konsolidasaun sira hodi dada investimentu rai liur nian, diversifika ekonomia, kria empregu no halakon ki’ak,” informa Taur Matan Ruak.

Taur Matan Ruak dehan, adezaun ba ASEAN ne’e, importante hetan objetivu sira ne’e.

Xefi Estadu ne’e dehan, TL konta ho Indonesia no Australia, nasaun belun no viziñu sira i belun sira seluk iha mundu nia apoiu, atu lori TL ba planu dezenvolvimentu sosiál no ekonómiku ba oin.

Taur Matan Ruak dehan, tanba buat ida ne’e mak TL sei hetan rekoñesementu ba lejimitidade atu partense ofisialmente ba uma kain bo’ot nasaun ne’e, ba efeitu prátika sira hotu, realmente TL tama tiha ona iha laran.cos

Jornal Nacional