Jornalista ANTIL Tuir Formasaun Jornalizmu iha Cenjor

Lisboa (06/06/16) - Jornalista Ajensia Notisioza Timor-Leste (ANTIL) hamutuk ema nain 7 inklui funsionariu Sekretaria Estadu Komunikasaun Sosial nain 3, tuir formasaun kona-ba serbisu ajensia notisia nian iha Sentru Protokolar Formasaun Profisional ba Jornalista (Cenjor) iha Lisboa, Portugal, 06 Junu-06 Jullu 2016.

Prezensa partisipante nain 10 iha Cenjor nee atu haklean tan sira nia konesementu kona-ba serbisu ajensia notisia, hafoin sira atende formasaun neebe hanesan iha LPDS (Lembaga Pendidikan Dr. Soetomo) Jakarta, Indonezia, iha fulan kotuk.

Partisipante sira apriende iha Cenjor durante semana haat no semana ida observa direta serbisu ajensia notisia iha Ajensia Notisia Lusa.

Diretor Jeral Sekretaria Estadu Komunikasaun Sosial, Orlando da Conceicao, neebe akompana formandu sira hateten katak formasaun ida nee importante tebes tanba hasae konesementu jornalista ANTIL atu bele kontribui kualidade serbisu  ba ANTIL.

Iha fatin hanesan, formandu Manuel Pinto informa katak, en-prinsipiu, serbisu ajensia notisia nee hanesan ho media maenstream  sira seluk maibe serbisu ajensia notisia nee prioridade liu-ba verifikasaun, kompletu, lalais no tane as kodigu etika jornalista.

Nia dehan katak nia kontenti tanba bele sai jornalista dahuluk ba ajensia notisia ANTIL. Nuudar jornalista ANTIL, nia sei kontribui ninia kualidade serbisu ba ajensia refere. Formasaun nee finansia hosi Sekretaria Estadu Komunikasaun Sosial (SEKOMS). (*)

Matadalan