Jovem Timor-Leste iha Tempu Modernizmu nia Laran

Hosi Carlito d’ Costa Araujo’OC*) - opiniaun

Wainhira ita fó tempu uitoan hodi halo reflesaun ba mundu ida ne’e, ita hasoru buat barak mak transfórma no mudansa tiha ona. Transfórmasaun ne’ebé mak iha la’os de’it iha parte dezenvolvimentu fiziku de’it, maibé refere mós ba iha dezenvolvimentu no transfórmasaun umanu nian. Katak, iha mundu ida ne’e nia lala’ok ita hasoru iha mudansa dinamizmu ne’ebé mak atrasa mós ho mundu ida ne’e nian lalaok. Transfórmasaun ida ne’e akontese kuaze iha fatin no areia hot-hotu, katak liu-hosi modernizmu fó influensia ne’ebé fórte tebes ba rai hot-hotu atu transfórma no dezenvolve a’an ba faze ne’ebé diak liu no modernu liu, tuir ejizensia moris ema no mundu nian.

Ho razaun ida ne’e, bele deklara katak mundu agora tama iha era ne’ebé mak modernu, impaktu hosi modernizmu ida ne’e mós, Timor Leste hasoru. Katak iha mundu ne’e nia lalaok iha ritmu ne’ebé mak dinamizmu. Realidade no impaktu hosi dinamizmu mundial ida ne’e ema hot-hotu, li-liu jovem Timor Leste hasoru, katak realidade modernizmu nunka mais bele haketak a’an ho involvementu no partisipasaun hosi jovem sira. Katak jovem sira mós tama iha area dezenvolvimentu modernizmu mundu ida ne’e. Atu deklara katak iha lalaok modernizmu ida ne’e iha mós aspeitu barak ne’ebé mak persiza fó atensaun katak bele sai ameasa ida ne’ebé mak fó impaktu negativu, no iha parte seluk fó impaktu pozitivu ne’ebé mak bele transfórma ema ba iha dezenvolvimentu ne’ebé mak diak no iha valor benefisiu ba ema hotu, li-liu ba jovem sira, espesial joventude Timor ne’ebé mak komesa tama iha faze modernimmu no transfórmasaun li-liu iha areia edukasaun, teknologia, siensia, life style no sel-seluk tan ne’ebé mak hetan influensia hosi modernizmu no globalizasaun.

Jovem iha tempu modernu iha mudansa ne’ebé signifikante tebes, mudanza ida ne’e bazeia mós ba realidade ne’ebé mak tama ona ba tempu modernizmu nia laran. Mentalidade ema nia mós transfórma tuir ejizensia hosi lalaok mundu ne’e nian ne’ebé mak iha mudansa makaas tebes. Transfórmasaun ida ne’e akontese radikal tebes tamba mentalidade tradisional nian ne’ebé mak uluk sei iha influensia makaas ba moris tradisaun nian agora lakon daudaun ona tamba tama ba realidade modernizmu ne’ebé mak fó mós impaktu ba mentalidade no konseptu moris ema nian li-liu ba moris jovem sira iha tempu agora. Konseptu hanesan vida familiar, kustume no volor tradisaun ne’ebé mak kesi metin lalaok jovem sira komesa lakon daudaun ona tamba situasaun urbanizasaun no industrializasaun ne’ebé mak impaktu hosi modernimmu ne’ebé mak la’o lalais tebes iha tempu seculo ida agora, ne’ebé mak fórte tebes ninia impaktu ba jovem sira nia hanoin. Transfórmasaun ida ne’e mós hetan influensa husi revolusaun media ne’ebé mak fó liberdade ba moris ne’ebé mak livre tuir modelo lala’ok mundu nian, li-liu iha parte moris no kna’ar lor-loron nian. Ho ida ne’e ita bele dehan katak, moris iha tempu modernizmu nia laran muda mós mentalidade no konseptu moris hosi ema sira, espesial ba jovem sira nian lala’ok moris.

Iha konseptu oi-oin ne’ebé mak refere ba jovem (adolosentes) sira, maibé buat ne’ebé mak ita labele nega mak katak, realidade transfórmasaun mundial iha aspeitu teknologia no sciensia ne’ebé makas iha sekulo ohin fó mós impaktu ne’ebé signifikantes tebes ba mentalidade no karakteristika husi fóin sa’e (adolosentes) sira nia moris. Liu-hosi dezenvolvimentu iha area teknologia, siensia no industria ne’ebé mak lalais iha ne’eba mós iha mudansa ba mentalidade, hanoin no ezijensia moris hosi ema ida-idak nian. Ne’e dunik, wainhira laiha kontroladu ne’ebé klean hosi sosiedade no familia kona-ba lalaok jovem sira, jovem sei tama ba ransu ou moris ne’ebé livre entre sira ho sira. Ida ne’e sei fó ameasa ne’ebé peregu tebes ba jovem sira nia futuru.

Iha sosiedade ou realidade kontekstu Timor-Leste nian, ita sempre rona ou hasoru direitamente kona-ba jovem sira nia moris ne’ebé sempre nakonu ho dezafiu (challenges). Wainhira laiha kontroladu ne’ebé diak hosi sosiedade ou familia dalabarak jovem lakon nia konxiensia atu bele hatur a’an iha pozisaun ne’ebé bele fó benefisiu ne’ebé pozitivu ba nia moris. Nune’e, iha tempu modernizmu nia laran jovem ou li-liu fóin sa’e sira tenki hametin sira nia án ho reflesaun no uza konxiensia atu bele defini no hatuur án didiak iha realidade moris nia laran. Tamba, problema ne’ebé ita sempre hetan iha jovem sira nia moris mak moris livre, ransu (badiu), droga, sexu livre no moris ne’ebé la kese metin ho regra no norma ne’ebé mak fórte. No wainhira jovem sira tama iha situasaun ne’ebé la kontroladu hosi ema seluk mak jovem sei moris iha liberdade ne’ebé sei fó ameasa ba nia futuru rasik.

Wainhira koalia kona-ba modernizmu, sempre lori impaktu pozitivu ne’ebé mak fó benefisiu ba ema nia moris, maibé dalabarak mós modernizasaun ne’ebé iha lori mós impaktu ne’ebé negativu wainhira ema, li-liu jovem sira nia mentalidade (kapasidade) laiha preparasaun ne’ebé fórte, katak laiha koñesimentu ne’ebé klean iha sira a’an atu bele asesu tama iha era-modernizmu nia laran, jovem sei tama iha lasu modernizasaun ne’ebé mak sei lori fóin sa’e (jovem) sira ba dalan negativu ne’ebé peregu tebes ba sira nia vida moris. Dala barak ita hasoru iha ita nia realidade nasaun ida ne’e katak, jovem barak mak gasta tempu no opurtunidade ho festa, ransu, droga, moris livre no moris ho goza de’it. Jovem barak la utiliza tempu ho diak hodi aprende, estuda no dezenvolve a’an iha aspeitu barak ne’ebé bele fó bantajem pozitivu ne’ebé mak diak ba sira nia futuru. Ita mós hasoru jovem barak lakon sira nia opurtunidade atu susesu iha aspeitu oi-oin tamba la utiliza ho diak tempu ne’ebé sira iha.

Wainhira ita la’o iha Sidade Dili nia laran, fatin hira mak sai fatin ba turizmu, rekreu no paseu sempre nakonu ho jovem, jovem barak mak gastu tempu ho paseiu, badiu, lao halimar no hakarak santai de’it. Iha termu ne’ebé ás liu katak jovem iha tempu modernizmu ne’e tama iha konseptu hedonizmu, konsumerizmu no materializmu. Katak, iha mudansa mentalidade ne’ebé makaas entre jovem iha tempu agora. “time is money to be Success ” la tama iha konsepto jovem sira. Ita bele hasoru katak, iha jovem uitoan de’it mak utiliza sira nia opurtunidade hodi fó importansia ba sira nia paisazem moris iha futuru nian liu husi aprendizazem, kursu, estudu no aprende rasik ba a’an.

Iha opurtunidade barak mak lakon saugati de’it iha jovem sira ne’ebé mak moris la ho komitmentu no prinsipiu ne’ebé fórte. Programa barak mak eskola, universidade no instituisaun siensia nian tantu mós opurtunidade barak mak governu (Estadu) harí maibé ita haré iha neba jovem uitoan de’it mak hola parte atu bele hetan benefisiu ruma ba sira nia matenek no kapasidade, katak aprendizazem ne’ebé mak diak dala barak jovem sira la fó importasia. Ema barak hili liu dalan ne’ebé bele fó gostu ba sira nia moris; fóin sa’e barak mak gasta tempu barak liu ba ransu, passaeiu no santai de’it. Iha tempu modernizmu ne’e mós ita sempre hasoru katak liafuan sakrifisiu komesa lakon ou menus iha konseptu no hanoin fóin sa’e sira, “mental instan” komesa domina jovem sira nia moris. Hakarak moris santai, livre no hetan gostu ba sira nia hakarak de’it. Realidade ida ne’e akontese iha estudante sira, ne’ebé mak dalarak la haka’as sira án ho estuda no aprende mesak atu aumenta kapasidade pessoal. Realidade ida ne’e mak akontese iha fatin barak, tamba teknologia no media komunikasaun ne’ebé mak iha fó opurtunidade ne’ebé fasil liu ba jovem sira atu asesu infórmasaun ne’e dunik estuda no sakrifisiu liu husi le’e no exersiziu pratikamente ne’ebé persiza tempu la dun iha ona interese iha konseptu jovem sira.

Modernizmu ne’ebé akompañaa mós ho globalizasaun iha aspeitu siensia no teknolojia lori mós impaktu ba transfórmasaun hanoin ba foinsa’e sira. Liu-hosi dezenvolvimentu ne’ebé lalais tebes iha aspeitu no koseptu moris modernu ida ne’e iha mós transfórmasaun no mudansa ne’ebé signifikante tebes ba ema nia hanoin. Dezenvolvimentu no globalizasaun nia lalaok positivu no fó benefisiu ne’ebé barak tebes, maibé wainhira ema (li-liu jovem sira) kuandu la sukat nia pasu hodi tama iha modernizasaun nia laran, ema sei lakon nia konsensia hodi tuir gostu no hakarak ne’ebé bele fó ameasa ba ema ida-idak nia komitmentu no moris. Ne’e dunik, saida mka sai reflesaun ba fóin sa’e sira mak, oinsa ema ida-idak bele valoriza no uza konxiénsia rasik atu bele defini dalan moris nian. Hodi nune’e opurtunidade diak ba futuru la lakon nune’e de’it. Nu’udar jovem tenki iha espiritu ne’ebé maka’as, esperansa ne’ebé fórte no komitmentu ne’ebé metin atu nunee iha globalizasaun no modernizasaun nia laran bele hili no tuir dalan ne’ebé bele fó benefisiu iha futuru. Jovem mak ai hun nasaun, jovem mak dalan dezenvolvimentu nasaun ida ne’e nian. (*)

*) Kerek-Na’in Hela iha Hera, Comunidade Carmelita Sto. Elias

**Matadalan