DESKONFIA TT MANIPULA ESTADU

Estadu Timor-Leste deskonfia kompañia Timor Telekom (TT) halo manipulasaun ba dívidas, tanba evidensia atu justifika kompletu.

Tuir pedidu husi TT nian ne’ebé hato’o ba Estadu,  katak dívidas Estadu seidauk selu ba TT hamutuk U$ 9.5 milloens, maibe invoice  ne’ebe  maka Ministeriu Finansas (MF) identifika ona dívidas balun  Estadu halo ona pagamentu.

“Ami identifika ona  invoice  balun,  no invoice  balun ne’e Estadu halo ona pagamentu, maibe sira kontinua hatama invoice  ne’e. Tanba  ne’e maka Governu hateten  ida ne’e la’os dívidas ona, tanba ami iha  evidensia pembayaran, nusa maka kontinua tan,”esplika Vise Ministru Finansas (MF) Helder Lopes ba jornalista iha Palasiu Governu, Tersa (07/06).

Helder Lopes subliña, instituisaun Estadu no liña Ministeriais balun hateten dívidas  husi TT hatama mai Estadu, la’os dívidas, tanba  sira selu ona.

“Ha’u bele hateten katak, Ministeriu  no instituisaun barak maka  konfirma  ona katak,  pedidu  ne’ebe TT sira hatama mai Estadu ne’e barak maka hateten dehan la’os  dívidas,”tenik Helder Lopes.

Tanba  ne’e maka, nia dehan, prosesu verifikasaun ne’e sei  la’o hela ne’ebé lidera husi MF rasik servisu hamutuk  ho entidades tomak. Hafoin ida ne’e mak sira sei lori fali nia rezultadu ba aprezenta iha Konselhu Ministrus (KM).

“Husi prosesu verifikasaun   ida ne’e bele rezulta bua tolu, primeiru  Governu bele selu tuir  numeru ka figura ne’ebe maka TT hato’o, Segundu Governu bele selu menus husi U$ 9.5 milloens  ne’ebe maka sira hato’o, ou Governu nein selu doit ida. Ami identifika ona invoice balun, maibe sira kontinua hatama nafatin,”tenik Helder Lopes.avi

Jornal Nacional