TUSAN BARAK TANBA JESTAUN LADIAK

Reprezentante povu iha Parlamentu Nasional (PN) husi bankada FRENTI Mudansa, José Luis Guterres, konsidera tusan barak ne’ebé Governu iha, tanba laiha jestaun ne’ebe diak.

“Ita presiza haree ita nia jestaun, ita nia sistema finansa mos seidauk diak, buat barak maka presiza hadia, ami espera katak buat ne’ebe akontese agora halo tusan barak ne’e hanesan akontesementu ikus ona, Estadu labele halo hanesan ne’e” dehan Deputadu José Luis Guterres iha PN, Segunda (18/07/2016).

Nia hatutan, Estadu labele haruka ema halo deit, depois selu laiha kontratu. Tanba ne’e nia sujere tenki iha kontratu nune’e bele garantia ema  setor privadu, katak Estadu sei selu bainhira iha kontratu.

“ita haree buat ne’e hanesan ne’e wainhira Estadu la selu ita nia setor privadu nasional, sira mos sofre ho buat sira ne’e, balun bangkrut tamba Estadu la selu obra ne’ebé sira halo” dehan nia.

Nia dehan tan katak, maioria setor privadu halo tuir knaar ne’ebe iha maibe ladauk selu, pior liu maka lori tempu naruk maka selu, buat hirak ne’e maka estraga dezenvolvimentu rai laran la fo oportunidade ba setor privadu sira atu buras liu tan.

Kona ba se mak outoriza hodi halo dividas ne’e Deputadu ne’e hatete, ida ne’e Ministeriu sira balun maka autoriza buat sira ne’e tamba uluk iha dekretu de Governu dehan katak bele halo uluk depois Governu sei sertifika depois halo kontratu.

“Mai ha’u buat hotu halo ne’e tenki iha kontratu ita labele halo buat ida sem kontratu ida ne’e lalos, ita nia lei  tenki garante servisu diak, tenki garante katak Estadu kuandu halo kontratu nia tenki selu de forma tempada, agora iha kontratu dala ruma selu tarde,”dehan nia. Nes

Jornal Nacional