KONFIA FILA KONGFU…!!!

Jornal Nacional, editorial

Loron diak, asinante no lé nain Jornal Nacional Diario. Publikasaun jornal konfiansa nee ba edisaun ohin loron nian nebe importante liu mak komentariu Sekretario Jeral FRETILIN, Mari Alkatiri nian nebe konsidera ema nebe Xanana Gusmão konfia tama governu nee mak fila kongfu Xanana hodi halo tusan bar-barak iha governu CNRT nian.

CNRT ukun periodu rua ona, Governu Aliansa Maioria Parlamentar husi 2007 too 2012 no governu Bloku Koligasaun hanaran V governu kosntitusional husi tinan 2012 too remodelasaun 2015 ho VI governu konstitusional nebe ho Primeiru Ministru, Rui Maria de Araújo husi Partido FRETILIN.

“Foin loron hira ba kotuk ita aprova Orsamentu Rektifikativu US$ 390,7  milhoens, osan barak atu selu tusan deit, tusan ita lahatene se mak halo, maibe Estado tenke asume, ema sira ne’ebe halo tusan ne’e riku matak deit no Estado mak tenke selu. Ema sira bai-bain Xanana konfia ne’e maka kungfu fali Xanana hodi halo tusan, tanba ne’e maka FRETILIN tenke hamutuk…,” Mari Alkatiri.

Hakarak ka lakohi, estadu tenki asumi responsabilide ho selu tusan nebe governu iha maibe governu tenki husu responsabilidade ba ema nebe halo tusan ba estadu tenki responsabiliza perante lei.

Tamba kompanhia sira nebe halo obra estadu nian, laos sira nia hakarak rasik maibe orientasaun Ministru sira, vise Ministru no Sekretario Estado sira, tan nee membru governu sira nee mak tenki responsabiliza, kompanhia sira laiha problema.

Losduni membru governu sira nebe kongfu Xanana nee tenki responsabiliza tamba halo tusan ba estadu. Membru governu sira nee  dalabarak laos manda kompanhia sira maibe dala barak nee kompanhia mak manda fali membru governu sira.

Lahatene los tamba sa? Realidade projetu barak laiha kontratu servisu, projetu finaliza ona, obriga governu selu. Nunee mos BOQ no dezenhu kompanhia rasik mak trasa, tau kustu projetu tuir gostu, problema sira hanesan nee mak sai kestaun ba kualidade obra, pior liu tan se membru governu no membru lejislativu sira broker iha laran.

Agora governu tau ona osan atu selu kompanhia malandru sira nee, maibe labele kontenti lai, selu, sei selu duni maibe sei liu husi prosesu naruk ida nebe ulun moras mos, anaunser iha pelicin ruma, gambang.

Nunee mos atu selu, Parlamentu nasional hari ona Komisaun Eventual atu halo fikalizasaun ba projetu sira nee hodi haree kualidade, BOQ no dezenhu projetu, la too iha nee deit, Tribunal mos sei prosesa hodi valida pagamentu nee.

Nebe projetu sira nee sei diak nafatin mak sei laiha probelma, projetu kleur ona nebe at fali ona mak kompanhia iha obrigasaun atu hadia se lae mos sei ulun moras atu hetan pagamentu husi governu.

Ne’ebe atu selu ka la selu , governu tenki selu duni, nee laos kompanhia ninia kulpa, membru governu nebe tutela ba obra nee ninia kulpa, importante mak obra nee iha duni no publiku sei utiliza hela.

Maske CNRT mak halo tusan maibe FRETILIN solidariza hodi fo votus konfiansa ba Orsamentu rektifikativu atu nunee osan motante nebe governu uza atu selu tusan sira nee, FRETILIN apoia teb-tebes maibe ho kondisaun ida, membru governu nebe halo tusan nee tenki responsabiliza perante justisa. *