quarta-feira, 20 de julho de 2016

KOMANDANTE UEP FO ONA SANSAUN BA JOSÉ LUIS


Komandante Unidade Espesial Polisia (UEP), Superintendenti Xefi Afonso dos Santos, afirma,  kazu kareta Batallaun Orden Publika (BOP) soke ai-rin elektrisidade ne’e komando fo ona sansaun ba komandante operasaun BOP, inspektur polisia, José Luis fila ba membru UEP baibain, no responsabiliza hadia rasik kareta ne’ebe mak a’at.

Kareta Polisia UEP iha ninia lolon tau simbolu BOP ne’e soke ai-rin eletricidade iha madre Canossiana Balide-Dili nian oin akontese iha semana kotuk foin lalais ne’e iha madrugada oras tuku 03:00 Otl rejulta kareta at iha parte oin inklui roda hat nakfera.

Akontesimentu ne’e iha loron Sesta (15/07/2016) mais u menus madrugada tuku 04:00 Otl, nebe ema sivil inisial PA ne’e hetan kanek iha parte liman, wainhira lori kareta BOP ne’e tanba deskonfia oknum Polisia husi BOP ho naran José Luis mak fo ba ema sivil inisial bifetok PA.

“Atu semak lori ka, la tolera sé deit no komando fo ona primeiru sansaun transferensia ba membrus UEP hanesan bai-bain no nia mak responsablidade tenke hadia rasik kareta,”deklara, komandante UEP, Afonso dos Santos, ba Jornalista sira iha Kuartel Jeral PNTL, Caicoli-Dili, Segunda (18/08/2016).

Nia haktuir katak, sansaun fo ona ba komandante operasaun BOP, no prosesu kazu ne’e ninia kontinuasaun la’o ba akontesimentu ne’ebe refere.

Entretantu, tuir relatoriu ne’ebe komando UEP simu katak, komandante operasaun BOP rekoñese an katak, nia parte mak fo kareta ba ema sivil lori kareta ne’e.

“Relatoriou nia rasik hatete, fo duni kareta ba ema ne’e mak lori, ema ne’e rasik la’os ema seluk polisia nia oan ida mak lori kareta ne’e, los duni hanesan ofisiais ida nia sei la bosok ba nia komandante sira,”haktuir koamandante UEP.

Nia hatutan, hafoin akontesimentu ne’e komando UEP foti kedas medidas ba José Luis hodi transfrensia husi komandante operasaun hanesan ofisial normal ka membru UEP bai-bain iha komando UEP. Eus

Jornal Nacional

Sem comentários: