Bolseiru timoroan sira simu billete hodi estuda iha Portugal, Kuba ho Cabo Verde

Grupu ida ho bolseiru timoroan hamutuk na'in 75 ohin simu simbolikamente sira nia billete no seguru viajen nian, antes hala'o viajen hodi estuda kursu sira dosénsia ba ensinu báziku no sekundáriu iha universidade sira iha Portugal, Cabo Verde no Kuba.

Bolsa sira, ne'ebé fó hosi Gabinete Apoiu ba Estudante sira (GCAE) hosi Ministériu Edukasaun timoroan nian, destina ba alunu sira ne'ebé sei estuda dosénsia iha ensinu báziku no sekundáriu, área rua ne'ebé ladún iha formadu sira iha Timor-Leste.

António da Conceição, ministru Edukasaun timoroan nian, destaka ona importánsia hosi programa bolsa sira hodi hametin rekursu ema timoroan sira nian ne'ebé konta ho apoiu hosi Portugal, Cabo Verde no Kuba.

"No ha'u ko'alia iha lian portugés tanba imi sei ba estuda iha nasaun sira ne'ebé ko'alia portugés. Hanesan dezafiu ida. Maibé obrigatóriu atu estudante domina lian hodi bele aprende", nia afirma ona.

"No tanba ne'e ha'u insisti atu imi hotu fó atensaun no dedikasaun maka'as ba estudu lian nian. Hanesan importante", hatutan hosi governante.

Nia esplika katak bazeia iha akordu bilateral sira ho Portugal, alunu sira sei hetan antes apoiu intensivu iha formasaun lian portugeza, hafoin ne'e kompleta tinan ida "zero" iha universidade sira antes hahú kursu formal.

Solusaun ida ne'ebé hakarak evita problema sira ho bolseiru sira iha pasadu ne'ebé senti susar maka'as ho portugés.

"Ha'u husu ba estudante sira atu uza oportunidade ne'e hodi estuda, hodi aprende no hodi hametin interkámbiu. Sai nu'udar timoroan oan iha ne'ebá maibé adapta ba kultura lokal sira", nia hatete.

Iha faze ne'e iha programa ida ho bolseiru hamutuk na'in 75, na'in 30 sei ba estuda iha Portugal, na'in 20 ba iha Cabo Verde no na'in 25 ba Kuba. Programa sei aumenta iha futuru.

Aleinde folin sira ho viajen sira no matríkula sira no propina sira - selu hosi Timor-Leste iha ámbitu hosi protokolu sira ho Governu sira hosi nasaun sira destinu nian - alunu ida-idak sei simu dolar 300 ba instalasaun inisial no dolar 300 resin ba material didátiku.

Fulan-fulan, alunu sira iha Kuba no Cabo Verde sei simu dolár 500 no alunu sira iha Portugal sei simu dolar 900.

"Ha'u husu ba aman-inan sira hodi ajuda no akompaña imi nia oan sira ne'ebé estuda daudaun. Ami sei akompaña maibé la'ós de'it responsabilidade hosi Ministériu Edukasaun nian", nia hatete.

"Ami felisita imi hotu. Formasaun ne'e hanesan importante ba imi no ba Timor-Leste. Sai hanesan responsável no senti nasaun. Fila ho formasaun. Ita presiza profesór sira. To'o tinan 2029 ita presiza tan profesór hamutuk na'in 3.000 resin", apela ona hosi ministru Edukasaun timoroan.

Dekretu ne'ebé regulamenta atribuisaun bolsa sira nian esplika katak fó "hodi apoiu formasaun akadémiku ne'ebé husu ba kualifikasaun hosi profesór sira ba siklu datoluk hosi ensinu báziku no ensinu sekundáriu jeral no tékniku-vokasional".

Sei abranje "área espesífiku oioin ensinu nian, haktuir ho falta hosi rekursu sira ema nian iha edukasaun", subliña iha testu.

Iha tinan hirak ikus ne'e hamutuk bolseiru timoroan na'in 3.400 resin maka hetan ona bolsa, sira estuda ona iha nasaun oioin iha Ázia, Europa, Áfrika no Amérika Latina.

António da Conceição fó sai mós katak Konsellu Ministru sira aprova ona dekretu ida hodi regulariza estatutu hosi profesór kontratadu sira.

"Nune'e ita bele ultrapasa situasaun ida pendente iha Ministériu Edukasaun nian", nia afirma ona.

SAPO TL ho Lusa