Washington sei lori lansamentu míssel foun norte-koreanu ba ONU

Estadus Unidus anunsia  iha kalan ne’e katak sei manifesta iha ONU  ninia preokupasaun kona-ba  lansamentu míssel foun  norte-koreanu ne’e, viola ona rezolusaun Konsellu Seguransa Nasoins Unidas nian.

"Ami iha  intensaun atu manifesta ami nia  preokupasaun ba Nasoins Unidas, hodi bele  reforsa  determinasaun  internasionál [ba Koreia do Norte] atu responsabiliza asaun provokada hirak ne’e", informa komandante Gary Ross, portavóz Pentágono, hafoin lansamentu míssel balístiku tolu  hosi Pyongyang.

Koreia do Norte tiru ona mísseil balístiku tolu iha ohin, anunsia Forsa Armada Koreia do Sul nian.

Iha semana liubá, Koreia do Norte halo ameasa tamba kauza hosi instalasaun sistema antimíssil ida norte-amerikanu nian iha Koreia do Sul.

Mísseil, ne’ebé lansa iha sidade Hwangiu, semo  entre kilómetru 500 no 600 tuir diresaun tasi  Japaun nian, tuir  komunikadu, ramu hosi Lider sira Forsa Armada sul-koreana nian.

Tensaun sa’e maka’as dezde Pyongyang realiza ninia teste nuklear badala haat,iha janeiru, tuir kedas ho lansamentu mísseil ida.

Iha marsu, Konsellu Seguransa ONU hamonu sansaun todan liu to’o agora ba Koreia do Norte hafoin  Pyongyang hala’o ninia teste nuklear badala haat no tiru ho 'rocket'ida, ne’ebé haree hanesan teste míssil balístiku enkobertu.

SAPO TL ho Lusa