LUGU: XANANA LA KOÑESE EMA BARAK

Reprezentante povu iha Parlamentu Nasional (PN), Jose Luis Guterres hatete maun Xanana la koñese ema hotu iha Timor, koñese maibe balun deit.

“Ha’u lembra tamba uluk servisu ho Xanana durante tinan 5, Xanana nia hakarak maka dezemvolvimentu tenki lao lalais, nia objektivu mak ida ne’e, hakarak buat ne’e lao lalais, lao ho diak, prontu desisaun ita halo ona baseia ba dekreitu de Governo uluk nian, agora sei ita persija muda ita bele muda, hau fiar katak antes de inisia kualker obra ne’e tenki iha lai kontratu,”dehan Deputadu José Luis Guterres iha PN, Segunda (18/07/2016).

Kona ba saida maka Mari Alkatiri dehan, tusan barak tamba halo husi ema ne’ebe Xanana fo konfiansa Deputadu ne’e hatete la presiza komentariu kona ba ida ne’e.

“Ha’u respeita ema hotu hotu ne’ebe iha hanoin diferente, ha’u respeitu mos ha’u nia kolega, amigos Mari Alkatiri nia hanoin ne’ebe ha’u la presiza halo komentariu sobre ida ne’e, los ka lalos ha’u labele hatete ida ne’e tamba uluk ha’u iha kintu Governu maneira Xanana nian ne’e nia la koñese ema hotu, balun deit, mas bele akontese mos katak ema sira ne’e mai husu katuas asina maibe buat ne’ebe importante iha Xanana nia hanoin maka fo oportunidade ba Timor oan”  deahan Lugu.

Iha fatin hanesan, Deputadu Osorio Florindo, hatete, Permeiru Ministru ida hili membru Governu tamba konfiansa, agora oinsa maka membru Governu ida uza konfiansa ne’e hodi servisu ba povu, servisu ba Estadu ida ne’e maka ema barak kestiona.

“Ema barak hetan konfiansa maibe la uza ho diak, balu uza konfiansa ida ne’e halo fali kungfu, halo kungfu ne’e maka hamosu dívidas, projetu kualidade la iha, projetu sira ne’e prosesu aprovizionamentu laiha, super vizaun laiha” dehan Deputadu Osorio Florindo iha PN.

Nia hatutan, projetu hotu-hotu iha Timor barak maka kualidade laiha tamba laiha laboratoriu referensia ida ne’ebe maka atu fo desizaun katak, material ne’e tebes duni nia kualidade iha ka lae, depois nain ba projetu laiha supervizaun ida no ADN no Obras Publika la konsege koopera hamutuk.

“Ha’u hanoin tenki hadia, nasaun bo’ot ida supervizaun ne’e tenki iha, exemplu nasaun seluk ema kontratu instituisaun ida nia maka supervizaun projetu tomak ida ne’ebe ladiak ne’e ita bele husu nia responsabilidade, agora ne’e se maka supervizaun ita la hatene, sasan sira ne’e maka halo projetu kualidade laiha i ema sira ne’ebe servisu ne’e aproveita ita nia frakeza, instituisaun ne’ebe seidauk forte, seidauk harii, entaun sira uza ba ezekuta projetu konformi sira nia hakarak,”dehan nia. Nes

Jornal Nacional