Imigrasaun Indonezia Deporta Estudante DIT 51

DILI - Servisu Imigrasaun Indonézia deporta tiha ona estudante hosi Dili Institute of Technology (DIT) hamutuk ema na’in lima nulu resin ida (51) ne’ebé ba halo peskija iha Pati Semarang-Indonézia.

Rajaun imigrasaun foti desizaun ne’e tanba rajaun rua mak hanesan, DIT haruka estudante sira ne’e ba halo peskija iha kompañia ne’ebé konsideradu ilegál. No estudante sira ne’e uza visa on arrival.

Adidu Edukasaun ba Indonézia Thomas da Silva, haktuir, bainhira nia rona informasaun ne’e nia halo kedas kontaktu ho responsavel DIT ne’ebé akompaña estudante sira no parte imigrasaun.

Thomas hatete, informasaun hosi parte imigrasaun, estudantes DIT 51 ne’e halo duni sala kontra regras imigrasaun no kompañia ne’ebé halo akordu ho DIT hodi haruka estudantes sira ba halo peskija ne’e, kompañia ilegál  (bazeia ba imigrasaun Pati nian informasaun ne’ebé hato’o mai Adidu Edukasaun).

Thomas dehan, solusaun ne’ebé nia inisia hodi resolve kazu ne’e maka nia kontaktu ba xefe imgrasaun Pati Jawa Tengah, fó garantia, nune’e imigrasaun bele aselera prosessu investigasaun antes halo deportasaun ba Timór.

Relasiona ho informasaun ne’e, Reitór DIT, Manuel Vong via-telefone ba Timor Post, Tersa (18/10), klarifika, nia estudante 51 ne’e fila tiha ona mai Dili, la’ós tanba kompañia ne’ebé DIT halo koperasaun mak ilegál, maibé tanba estudante sira uza visa on arrival.

“Uza vistu on arrival ne’e labele halo prátika, entaun imigrasaun husu ba estudante sira ne’e fila-fali mai trata dukumentus sira ne’e halo didi’ak  maka bele fila-fali ba, ne’e diferénsia buat ida deportasaun ne’e,” Reitór Lito Von hatete.

“KBRI Indonézia nian maka fó informasaun ba estudante sira ne’e no trata estudante sira nia dokumentus no haruka estudante sira fila fali mai Timor, ita nia rain ne’e ema mai uza vistu On Arrival bele hela, ne’ebé ita nia estudante sira ba iha ne’eba uza mós vistu On Arrival hodi halo peskiza ne’e labele,” Reitór haktuir.

Entaun prontu fulan ida sira remata, sira husu fila fali mai trata falisuratho normál liu hosi Ministériu Edukasaun no selseluk tan para sira bele ba fila-fali.(*/fer)      

Timor Post