quinta-feira, 5 de janeiro de 2017

Eleisaun 2017 Kompetisaun Sei Makas Liu Tan

DILI (ANTIL) - Eleisaun ne’ebé mak sei akontese iha tinan ida ne’e nia laran hanesan eleisaun Prezidensial no Lejislativu sei iha interese polítika no kompetisaun makas tebe-tebes kompara ho sira ne’ebé mak akontese ona.

“Eleisaun tinan ida ne’e, interese polítika sei boot tebe-tebes tamba kompetisaun maka’ás la hanesan tinan uluk-uluk,” membru asembleia konstituinte Leandro Isaac informa ba ANTILbainhira hasoru malu iha Ótel Timor, Kinta (05/01).

Nia dehan, kompetisaun makas tanba eleisaun sira ne’ebé liu ona, partidu polítiku sira uza istória hodi influensia povu, hafoin hetan ukun rezultadu dezenvolvimentu la’o hakdasak nafatin.

Leandro konsidera polítika governu hodi halo resenseamentu ba nasaun Portugal no Australia ne’ebé foin akontese iha tinan ida ne’e hanesan inisiu manipulasaun ba rezultadu eleisaun.

“Tinan  ne’e iha resenseamentu ba timor oan iha estranjeiru ne’e intensaun ida mak buka apoio hosi eleitores hosi liur hodi bele manipula, portanto ita hotu mak tenki matan moris no neon nain,”  Leandro Isaac observa.

Hodi hatutan forsa polítiku sira ne’ebé ohin loron ukun obrigadu tenki hamosu polítika resenseamentu ne’ebé durante ne’e la akontese, maibe iha tinan ida ne’e halao tanba sira hatene ona katak, populasaun klasse média intelektual iha rai laran (Timor) susar ona atu manipula, agora sira konta ho rai liur. No sei uza Embaixada ou konsuladu hodi halo manipulasaun, bainhira iha oportunidade.

“Partidu sira nebe atu kompete tenki akompaña ho didi’ak iha eleisaun. STAE ho CNE poder polítiku mak hili nune’e iha servisu bele akontese buat balun ne’ebé ita la espera,” Leandro fó hanoin.

Resenseamentu ba timor oan iha estranjeiru governu diside ona atu extende to’o 17 Janeiro 2017. (Jornalista: Manuel Pinto/Editor: Alberto Alves)

Sem comentários: