quinta-feira, 5 de janeiro de 2017

MILIAUN 14 USD BA FESTA DEMOKRASIA …!!!


Jornal Nacional, editorial

Eleisaun presidensial fulan rua mai tan, Marsu no eleisaun Parlamentar fulan nen tan, Jullu tinan nee nia laran. Eleisaun 2017 mai nee nudar segundu eleisaun presidensial no parlamentar nebe Timor oan rasik mak organiza, primeiru eleisaun 2012 hafoin mandatu Nasoens Unidas remata iha 2011.

Eleisaun 2012 Timor oan rasik mak organiza maibe lao iha ambiente paz no estabilidade maske iha perturbasaun seguransa oituan iha rai laran wainhira formasaun governu foun iha loron 8 fulan Agustos.

Festa demokrasi boot rua mai nee presiza ema hodi organiza prosesu nee , fasilidade eleisaun nian no gasta osan nebe laos oituan, tan nee eleisaun tinan 2017  nee , governu aloka ona osan miliaun 14 dollar amerikano.

Total orsamentu ba eleisaun nian nee, miliaun 10 dollar amerikano ba Sekretaria Teknika Administrasaun Eleitoral (STAE) no miliaun 4 USD aloka ba PNTL no F-FDTL aseguransa festa demokrasia nee lao susesu.

 “Husi total US$ 14 Milloens ne’e, US$ 4 Milloens ba PNTL no F-FDTL, US$ 10 Milloens ba STAE, osan ne’e tau hotu ba dotasaun toda Governu la tau hamutuk ho osan Estatal nian, ne’ebe Ministeriu Finansas mak haree rasik osan ne’e, osan US$ 4 Milloens ba seguransa no defeza ne’e tanba sira presiza transporte no buat seluk hodi fo seguransa durante eleisaun, to’o mai halo apuramentu” Dionisio Babo Soares.

Los duni, eleisaun presiza osan boot, li-liu osan ba STAE atu bele organiza eleisaun nee ho diak. Osan sira nee sosa suratahan, tinta, rekrutamentu brigada, selu fiskais, transportasaun materiaias eleisaun nian no  imprime buletim votus.

Alokasaun orsamentu ba PNTL no F-FDTL nee mos importante tamba tuir survei nebe organizasaun internasional halao iha Novembru 2016 liu ba hatudu katak 65 porsentu preokupa ba seguransa iha eleisaun mai.

Ne’ebe razuavel atu instituisaun seguransa no defesa rua nee hetan alokasaun orsamentu atu bele asegura festa demokrasia nebe povu tomak hein iha tinan lima nia laran, hodi halo mudansa lideransa iha Estadu rai doben ida nee.

Maibe mos orsamentu ba polisia no militar sira nee labele sai fali hanesan saida mak partido Golkar hatudu iha tempo indonesia nian, rezime Soeharto halo nebe mobiliza polisia no militar hodi apoiu ba partido Golkar ukun too tinan 34 nia laran.

Publiku fiar ba ita nia polisia no forsa sira nia disiplina,  independensia no neutralidade maske membru polisia no membru forsa nudar sidadaun iha mos direitu ba vota hodi hili kandidatu ka partido nebe nia hakarak.

Timor Leste país posto konflitu no estadu fragil, eleisaun sira hanesan nee sai atensaun mundo internasional hodi halo observasaun ba eleisaun nebe sei mai. Tan nee eleisaun mai nee sei sai teste ida ba demokrasia nebe Timor Leste iha.

 Festa demokrasia mai nee tenki garante kada sidadaun eserse ninia direitu votos ho libre, geral no segredu ba kandidatu sira no partido politiku nebe  nia prefere, laiha intimidasaun no ameasas.

Durante nee Timor Leste ninia demokrasia sai ezemplu ba mundo tomak, demokrasia ala Nasoens Unidas, li-liu oinsa organiza festa demokrasia ‘eleisaun’ ida tamba nee Timor Leste hetan konfiansa husi Nasoens Unidas hodi organiza eleisaun iha  Guine Bissau, país membru CPLP.

Agora importante laos osan hirak mak gasta no gasta ba se, importante mak eleisaun mai nee tenki lao duni iha koridor demokrasia. Povu tomak uza ninia direitu vota no vota ho libre, laiha ameasas k intimidasaun ruma. *

Sem comentários: