PM RUI PROMETE SEI TAU MATAN BA AIFAESA

Primeiru Ministru (PM), Rui Maria de Araújo hateten, ninia parte sei tau matan ba servisu Autoridade Inspeksaun  Fiskalizasaun Ekonómika Sanitaria  Alimentar (AIFAESA) Institutu Públiku, tanba  institutu  ne’e tutela iha Gabineti Primeiru Ministru nian.

“Ita   bo’ot sira hatene tuir lei instituisaun, nia iha autonomia finanseiru orsamentu,  signifika nia  jere rasik ninia orsamentu, maibe  tutela ha’u nian, portantu ha’u sei tau matan ba  ida  ne’e,”esplika PM Rui, liu husi seremonia  auto entrega servisu Inspeksaun Alimentar Ekonomia, husi Ministério Comersio Industria e Ambiente (MCIA) ba AIFAESA, iha Matadoro, Kuarta (04/01).

PM Rui dehan,  razaun  fundamental hamosu  instituisaun AIFAESA, tanba  durante  ne’e instituisaun sira la’o ketak-ketak laiha  koordenasaun ba malu, entaun iha debate Orsamentu Jeral Estadu 2015 liu ba  Governu foti desizoens oinsa  instituisaun sira tenki tau iha fatin ida deit, tanba sensitividade setores  hotu, saude agrikultura  ho tan Ministériu sira seluk, atu  nune’e  bele dudu prosesu intensaun konsumedores bele  la’o diak liu tan.

Entaun  prosesu tranzisaun hala’o  iha kedas definisaun estatutu organiku iha ne’eba temi prosesu tranzisaun  ninian, depois mekanismu hala’o tranzisaun  desde 2016 depois iha tinan 2017  ne’e tama ba prosesu  foun.

“Ha’u  nia  hanoin  prosesu tranzisaun ne’e la’os atu hases ema lae? prosesu  tranzisaun ne’e ninia  objektivu  prinsipal atu fo  buat  ne’ebé mak diak teb-tebes diak liu ba instituisaun  ne’ebé   mak  ita hakiak, tamba  ne’e mak  liu husi  prosesu rekrutamentu,” hateten PM Rui.

PM Rui dehan,  rekursu  humanus  ne’ebé mak  sei iha AIFAESA sei limitadu tebes, entaun presiza haree forma oinsa  bele enkuadra.

“Ba ema  ne’ebé mak nunka servisu iha area (inspeksaun) ninian fokus rekrutamentu  ne’e tenki haree ba ninia potensialidade atu aprende,  maibe  presiza  kualidade balun. Primeiru tenki vontade atu servisu,  Segundu tenki vontade atu aprende. Tanba   ne’e mak ha’u ninia hanoin instrusaun ba komisaun instaladora   ne’e mak méritu,”dehan PM Rui.

“Méritu  importante, signifika nia la’os tama, ha’u nia primu, ha’u nia subriñu ou nunka ha’u nia partidu, se  ita bo’ot rona buat ruma akontese halo favor hato’o informasaun,” hateten PM Rui.

Partisipa iha seremonia auto intrega  servisu IAE ba AIFAESA,  MCIA, Costáncio Pinto, ho Vise MCIA, Nino Pereira, no funsionariu sira IAE ninian.avi

Jornal Nacional