KRITIKA XANANA FANUN UNIVERSITARIU SIRA HADIA AN

Segundu Vise Ministru Edukasaun (ME), Abel da Costa Ximenes, konsidera liafuan ne’ebe eis Primeiru Ministru (PM), Kay Rala Xanana Gusmão, hasai katak, graduantes universitariu S1 no S2 laiha kualidade ne’e konsidera hanesan fanun ida ba universitariu sira atu kontinua hadia a’an.

“Deklarasaun ne’ebe mak maun bo’ot hato’o, ne’e  laos buat ne’ebe atu hatun ita, atu hatun ensinu superior sira iha Timor mais ida ne’e nudar aman ida ne’ebe iha responsabilidade bo’ot ba iha dezenvolvimentu nasional, ba harii nasaun ida ne’e, nia liafuan ne’e diak teb-tebes para motiva ita, fanu ita kona ba realidade ida kona ba ensinu superior iha TL ne’ebe ensinu superior hotu-hotu tenki buka hadia no milhora nia an,”Segundu VME, Abel da Costa Ximenes ba jornalista sira iha nia servisu fatin Vila-Verde Dili, Kinta (4/1/2017).

Kualidade ne’ebe eis PM Xanana preokupa ho graduantes universidade DIT, UNPAZ, UNDIL, UNTL no universidade sira balu iha rai laran ne’ebe tinan-tinan produs S1 ho S2 balu laiha kualidade.

liafuan ne’ebe refere konsidera mos nudar dezafia ba ME atu servisu diak liu tan nune’e hasae kualidade ensino superior sira iha rai laran.

“Liafuan ne’e mos fanun ME para servisu diak liu tan, ba oin bele halo servisu ida ke kualidade, e loke povu Timor nia  matan feto no mane katak, iha Timor ne’e iha ona ensinu superior ita lalika hanoin ita nia oan sira tenki  ba eskola iha rai liur,”haktuir VME ne’e. Ola

Jornal Nacional