segunda-feira, 16 de janeiro de 2017

Eleisaun prezidensiál timoroan sei hala’o iha 20 fulan-marsu, hetan pose iha 20 maiu

PARTILHAR
Prezidente Repúblika timoroan, Taur Matan Ruak, anunsia iha ohin katak  eleisaun prezidensiál timoroan sei realiza iha loron 20 fulan-marsu, permite ba pose xefe Estadu foun iha 20 fulan-maiu.

"Prezidente Repúblika Taur Matan Ruak marka ona eleisaun  ba  Prezidente Repúblika iha loron  20  fulan-marsu 2017, hafoin rona tiha partidu hirak ne’ebé ho  assentu parlamentar  no Governu", refere komunikadu ida Prezidénsia nian ne’ebé haruka ba Lusa.

"Prezidente Repúblika hein katak kampaña eleitoral no eleisaun  prezidensiál  bele la’o tuir  orden no dame, permite hili ho livre no informasaun sidadaun nian", refere komunikadu ne’e.

Tanba  eleisaun sei  realiza  iha 20 marsu permite, iha posibilidade, realizasaun ba segunda volta hafoin fulan ida, iha  20 abril no hetan pose xefe Estadu foun  iha  20 maiu.

Taur Matan Ruak konfirma ona, liuhosi entrevista ba Lusa iha 2015, katak  sei lakandidata fila fali ba kargu ne’e.

Komunikadu ne’e seidauk  konfirma kona-ba data eleisaun lejislativu ne’ebé  tenki hala’o moos iha tinan ida ne’e  no iha posibilidade bele marka ba inisiu jullu nian.

Aktu eleitoral ba tinan ida ne’e badahuluk  ho votasaun ba timoroan sira iha rai-liur, liliu iha Portugál no iha  Austrália, no hala’o hafoin realizaun  eleisaun lokal iha  outubru no novembru.

To’o agora  aprezenta ona kandidatura tolu ba eleisaun  prezidensiál, no hanesan  favoritu, ba tempu ne’e, prezidente Fretilin atuál, Francisco Guterres (Lu-Olo), ne’ebé sai hanesan ninia kandidatura badatoluk iha kargu ne’e.

Konfirma ona moos  kandidatura António Maher Lopes (Fatuk Mutin), apoiu  hosi  Partido Socialista de Timor (PST), no José Neves, eis-vise-komisáriu Comissão Anticorrupção (CAC), ne’ebé aprezenta hanesan  independente.

Iha moos kandidatura datoluk bele iha  José Ramos-Horta, ne’ebé hanesan xefe Estadu entre 2007 to’o 2012 (assume hela kargu bainhira hetan tiru iha  atentadu ne’ebé kuaze hasai nia vida) no to’o agora  seidauk konfirma karik  aseita ka la’e tuir  apelu setór oioin  sosiedade timoroan nian.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: