PM britániku sei husu uniaun ba sidadaun sira iha diskursu kona-ba 'brexit' - Jornal britániku sira

Primeira-ministra britániku sei husu "uniaun" ba sidadaun sira iha nia diskursu kona-ba 'brexit', ne'ebé hein ona, ne'ebé sei halo iha loron-tersa, hodi harii Reinu Unidu "global" ida, adianta ona hosi jornal britániku oioin iha loron-domingu.

Iha diskursu, ne'ebé sei halo iha palásiu Lancaster House, iha sentru Londres nian, hein katak Theresa May aprezenta detalle sira hosi estratéjia Governu nian hodi negosia ho Bruxelas kona-ba saida Reinu Unidu nian hosi Uniaun Europeia (UE).

Theresa May sei apela, ba partidáriu sira no mós ba sira ne'ebé hakarak sai hosi Uniaun Europeia, atu husik ba kotuk sira nia diferensa no "insultu sira".

Governu britániku seidauk ko'alia kona-ba publikasaun sira iha periódiku balun, ne'ebé antesipa iha loron-domingu parte balun hosi diskursu primeira-ministra nian, ne'ebé sei manifesta planu ezekusaun hosi "brexit" todan ida, ne'ebé sei hakotu asesu ba merkadu úniku europeu, ba uniaun aduaneiru iha área sira kontrolu imigrasaun nian no hakotu juridisaun hosi Tribunal Europeu Justisa nian.

Theresa May, tuir jornal The Sunday Telegraph ne'ebé haktuir fonte governamental, deklara ona katak "sidadaun sira sei hatene katak bainhira hatete katak ‘brexit’ signifika ‘brexit’, ne'e hanesan sériu".

Iha fatin seluk, ministru ba saída UE nian, David Davis, hatete ona ba jornal The Sunday Times katak sei buka hetan "aliansa foun no metin ida" ho membru 27 seluk hosi UE.

Tuir parte balun diskursu nian ne'ebé fó sai iha loron-domingu ne'e, Theresa May sei refere nesesidade hodi hametin unidade ho "objetivu hanesan sira", hanesan protesaun no hametin direitu ba traballador sira, hodi harii konsensu hafoin diálogu ajitadu entre parte sira iha fulan barak nia laran.

"Razaun ida tansá demokrasia iha Reinu Unidu sai hanesan susesu ida durante tinan barak nia laran maka hosi fortaleza hosi ita nia identidade hanesan nasaun, ba respeitu ne'ebé ita hatudu hanesan sidadaun sira, importánsia ne'ebé ita fó ba ita nia instituisaun sira implika katak bainhira iha votasaun ida, ita hotu respeita nia rezultadu", haktuir hosi líder britániku.

SAPO TL ho Lusa - Foto@ Andy Rain /EPA