NATALINO: LAIHA PROPOSTA ATU HALAKON LPV

Xefi Bankada Partido Conselho Nacional Recontrucção Timor (CNRT), Natalino dos Santos  ba JN-Diario hatete projetu alterasaun pensaun vitalisia ne’ebé mak mai husi bankada PD ho FRETILIN laiha artigu ida mak ko’alia konaba revogasaun ka halakon total lei pensaun vitalisia.

Xefi bankada CNRT, Natalino dos Santos  hatoo lia hirak nee hodi responde ba publikasaun Diário nian katak alterasaun lei pensaun vitalisia nee Fretilin hakarak halakon maibe CNRT mak vota kontra.

Nia dehan tan CNRT  kontribui maka’as ba alterasaun Lei Pensaun Vitalisia, tanba CNRT hakarak kumpri nia promesa ba nia eleitor sira iha tempu kampaña liu ba.

Natalino esplika CNRT bainhira hari’i iha 2007, ho kumprimisiu ida ba nia eleitor sira katak, kuandu hetan fiar, sei halo revizaun ba lei pensaun vitalisia.

“Tanba ne’e mak ami konsistente to’o agora, kuandu bankada FRETILIN ho PD hato’o sira nia inisiativa projetu da lei, ami konsistente ba ami nia komitmentu, ami submete ba alterasoens,” dehan Natalino.

Aprovasaun ba LPV nee, CNRT hakarak klarifika ba públiku konaba CNRT nia konsistente polítiku, hodi kumpri CNRT nia komprimisiu partidu nian ba povu Timor laran tomak.

“Iha ami nia komprimisiu iha kampaña katak, ami sei halo revizaun, redusaun ba lei pensaun vitalisia, tanba ida ne’e mak kuandu inisiativa PD ho FRETILIN nian, ami submete kedas, i ami kontribui hodi halo revizaun ba prosesu tomak iha lei ne’e duni,” relata Natalino.

Nia afirma, nia revizaun ne’e mós, CNRT rasik mak lidera komisaun eventual, tanba CNRT promete ona ba povu katak, bainhira hetan fiar husi povu, sei halo revizaun hodi redus pensaun vitalisia ne’e.

Alende ne’e, deputada Fernanda Lay husi bankada CNRT mós dehan, eis deputadu ka eis membru Governu tinan ki’ik ka bo’ot, sira hotu mós kontribui ba lala’ok prosesu konstrusaun Estadu ida ne’e.

“Durante tinan lima, nia para tiha servisu fungsionál ne’ebé hetan nia rendementu mensal, mai deputadu tinan lima, nia mós iha direitu ba pensaun vitalisia ne’e, maibé ho rejime kontributivu, sira ne’ebé mak ho idade produtivu, konserteza ne-neik pensaun vitalisia sei lakon, substitui rejime kontributivu ne’ebé aprova tiha ona,” relata Fernanda Lay.

Nia esplika, membru Governu ka membru Parlamentu ne’ebé mak ho idade produtivu hela, nia sei la simu de’it osan pensaun vitalisia ne’e, maibé tenki servisu mak simu.

Nune’e mós, deputada Carmelita Moniz husi bankada CNRT mós dehan, iha alterasaun lei pensaun vitalisia ne’e mós hatete, kuandu deputadu ka membru Governu sira ne’ebé mak se joven hela, depois sai husi deputadu ka membru Governu, ba servisu fali iha fatin seluk no hetan nafatin osan husi Etadu, nia laiha direitu atu simu tan pensaun vitalisia.

“Nia tenki eskolla, hakarak simu pensaun vitalisia ka, simu saláriu ida ne’ebé mak nia servisu hela, nia tenki hili ida, sei nia hili pensaun vitalisia, saláriu la simu,” katak Carmelita.

Nia hatutan, lei pensaun vitalisia ida agora ne’e, iha alinea ida ne’ebé hatete katak, tenki servisu mak foin bele simu pensaun vitalisia, labele simu de’it, tenki partisipa iha ministériu ruma mak bele simu, ne’e obrigatóriu.

Iha parte seluk, Presidente parlamento Nasional dehan LPV nee aprova iha final no global ho votus maioria, 42 afavor, 5 kontra no 5 abstein. Tamba nee parte Sekretarias PN nian sei haree redasaun final hodi haruka ba Presidente republika hodi promulga. cos

Jornal Nacional