Hakotu CMATS, Australia simu negosiasaun FM – Ramos Horta louva vizaun Xanana Gusmão

Lauriado Nobel da 1996, Jose Ramos Horta louva lideransa Xanana Gusmão tamba brani hakotu tratadu Certain Maritme Arrangement on the Timor Sea (CMATS) ho Australia hodi nunee Australia simu proposta Timor Leste nian halo negosiasaun ba fronteira maritima permanente.

“Sé uluk sira lakohi koalia konaba fronteira maritima, agora sira simu, hakiduk, i hatete ona prontu atu túr hahu koalia konaba fronteira maritima premanen, parabens ba Maun Xanana, Agio Perreira sira nain rua mak kaer    prosesu ne’e,  Bom, ami hotu-hotu nia apoiu laiha duvidas ba prosesu ida ne’e,” hateten eis Prezidenti Republika José Ramos Horta ba Jornalista, Caicoli-Dili, Sesta feira semana kotuk.

Diplomata senior Timor Leste nian nee konsidera, hakotu tratadu Certain Maritme Arrangement on the Timor Sea (CMATS) ho nasaun Australia ne’e sinal di’ak, ne’ebe TL espera ona tenke akontese, parabens ba Maun Bo’ot Kay Rala Xanana Gusmão hatudu nia vizaun no brani kaer prosesu ne’e.

Nia sublina liutan hakotu akordu tratadu CMATS ne’e nudar sinal di’ak, Australia mos hatudu prematismu sira nia matenek, hahu túr hamutuk koalia konaba fronteira maritima permanen.

Lider jerasaun tuan nee mos dehan tan,  prosesu rua mak tenke haree, primeiru hetan Fronteira Maritima ne’e la’os defikulidade ona, maibe Governu tenke kontinua hatudu nia matenek hala’o dialogu ho operador internasional sira dezemvolve Greater Sunrise.

Nia konsidera  Timor Leste (TL) manan  Fronteira Maritima (FM) sei implika ba rekursu finanseiru kuandu TL lahetan akordu dezemvolve Greater Sunrise hodi hala’o esplorasaun iha fatin seluk iha tasi Timor.

“Ita lahetan akordu dezemvolve Greater Sunrise, ita bele kontenti ho Fronteira Maritima, maibe rekursu finanseirus sei la iha,” hateten segundo Presidente Republika iha tempo restaurasaun independensia nee.  Maske nunee Jose Ramos fiar governu Timor Leste tamba dadaun nee halao hela diagolu ho kompanhia operador Conocophilips hodi haree estratezia seluk nebe diak ba Australia no diak ba kompanhia.

“Ha’u hatene dialog la’o dadauk ona entre ita nia membru Governu ho operador internasional sira hanesan Conochophilips para haree estratezia seluk, ne’ebe diak ba Australia, diak ba kompania sira ne’e no di’ak liu ba Timor Leste, atu dezemvolve Greater Sunrise iha fatin seluk iha tasi Timor,” tenik Horta.

Antes nee parte Igreja, Bispon Diocese Baucau, Dom. Basilio do Nascimento louva governu Timor Leste nebe hakotu akordu CMATS ho Australia nebe asina iha 2006.  Bispo Diocese Baucau, Dom Basilio mos agradese ba ekipa negosiador, li-liu eis Primeiru Ministru, Kayrala Xanana Gusmão ninia esforsu hodi too iha prosesu ida nee.Eus

Jornal Nacional