Konsellu Imprensa timoroan aprova kódigu foun ba Étika Jornalístiku nian

Direitu ba informasaun no buka lia-loos, honestidade no independénsia iha reportajen no ezijénsia hodi konfirma informasaun sira antes publika, hanesan elementu balun hosi Kódigu foun ba Étika Jornalístiku timoroan nian. 

Testu, ho pontu 10, hanesan regulamentu dahuluk ne'ebé aprova hosi Konsellu Imprensa timoroan nian no hanesan hakat konkretu dahuluk iha asaun hosi entidade nian, hanesan esplika hosi prezidente regulador hosi komunikasaun sosial timoroan nian, Vergílio da Silva Guterres, ba ajénsia Lusa.

Nia esplika katak hanesan testu ida ne'ebé konstrui ho baze iha kódigu dahuluk étika timoroan nian, ne'ebé aprova iha prosesu autoregulasaun ida hosi Asosiasaun Jornalista sira Timor-Leste nian (AJTL), hosi Sindikatu Jornalista sira timoroan nian (SJTL) no hosi Timor-Leste Press Club (TLPC) iha 2013.

Testu foun aumenta, iha pontu ida hosi lista kompromisu sira jornalista nian - "defende direitu hosi sidadaun hodi hetan informasaun" no "hodi buka lia-loos".

Entre alterasaun sira seluk inklui mós kompromisu hodi evita "publikasaun sira ne'ebé la presiza hosi liafuan sira, imajen sira ka lian balun ne'ebé transmiti sadizmu ka violénsia kona-ba ema sira ka animal sira no ne'ebé bele hamosu perturbasaun".

Rede sosial sira iha Timor-Leste, inklui pájina sira ne'ebé jere hosi órgaun sira informasaun sosial timoroan nian, iha publikasaun regular sira ne'ebé viola ona artigu hosi kódigu foun étika ne'e nian.

"Kestaun "online" hanesan buat ida ne'ebé ami tenki serbisu. Halo parte hosi ami nia mandatu. Bainhira publikasaun sira halo iha pájina sira hosi órgaun sira komunikasaun sosial (OCS) nian tenki halo tuir kódigu regulamentu sira hosi Konsellu Imprensa nian", nia hatete.

Salvaguarda prezunsaun hosi inosénsia arguidu sira nian, defende igualdade no la diskrimina, rejeita imitasaun no tentativa sira subornu nian, identifika fonte sira informasaun nian no klarifika apoiu finanseiru hanesan kompromisu sira seluk hosi kódigu ne'e.

Konsellu Imprensa (CI) mosu hanesan órgaun independente ida hodi regular área komunikasaun sosial, ho mandatu ida alargadu hosi fiskalizasaun no ho kbiit hodi anula lisensa ba OCS ka hasai karteira profisional ba jornalista sira.

Ho mandatu ida mediador nian entre públiku no jornalista sira iha mós kbiit hodi "halo asaun disiplinar nian ba jornalista sira, iha termu sira hosi regulamentu rasik".

"Ha'u la gosta haree CI hanesan de'it tribunal ida ba jornalista sira. Ha'u hatete ba jornalista sira katak di'ak liu tenta kumpri elementu sira hosi kódigu nian hodi evita atu ita tenta kbiit sira seluk hosi CI nian", nia esplika.

Hahú hosi loron simu pose ba elementu na'in lima hosi CI, iha fulan-Maiu tinan liubá, Konsellu halo ona vizita komparativu sira ba Austrália ho Indonézia - "viziñu sira ne'ebé besik liu" no ba Portugal.

Antes hakotu tinan dahuluk atividade nian, iha fulan-Maiu, Virgílio da Silva Guterres nia espetativa maka Konsellu Imprensa bele aprova mós prosedimentu sira hodi aprezenta kesar sira no reklamasaun sira hosi sidadaun sira no prosesu rejistu ba órgaun sira komunikasaun sosial nian no ba jornalista sira.

SAPO TL ho Lusa