Kupa: BUP Fiar An Lidera Governu Tuir Mai

DILI (ANTIL) – Hare’e ba prezensa Bloku Unidade Popular (BUP) ne’ebe dadauk ne’e lidera hosi Cecilio Caminha Freitas, forsa politiku foun iha Timor-Leste ne’e fiar an katak sei lidera governu tuir mai.

Vise Prezidenti BUP, Ermenegildo “Kupa” Lopes esplika, prezensa partidu 4 iha BUP hanesan Partidu Millenium Democratico (PMD), Partidu Republica Nasional Timor-Leste (PARENTIL), Partidu Liberta Povu Aileba (PLPA), Partidu Democratica Republikade Timor (PDRT) sai duni ona forsa politika iha Timor-Leste ne’ebe labele hare’e tan ho matan sorin.

“Bazeia ba esperensia eleisaun rua uluk nian, depois ami tuur hamutuk no konkorda iha BUP, ami fiar BUP sei tembus Parlamentu Nasional no sei lidera governu tuir mai,” dehan Kupa ba ANTIL, Segunda (16/01/2017), iha Dili.

Kupa ne’ebe mos nu’udar Prezidenti PMD esklarese, ho prezensa partidu politiku barak dadauk ne’e, se laiha partidu ida mak sei manan maioria.

“Ami mos sukat ona labele manan maioria, maibe ami fiar metin ami sei hamutuk ho partidu seluk hodi forma governu foun ne’ebe govenru ne’e ami sei hanaran Governu Republika Popular,” nia esklarese.

Tamba saida BUP hakarak hanaran Governu Republika Popular, tuir Kupa, naran ida ne’e bazeia ba filosofia BUP nian tuir teolojia Humanismu, Solidaridade Sosial no Justisa Sosial, ne’ebe buat hotu BUP halo bazeia ba popular (kerakyatan) nian.

Ho programa ne’ebe iha hanesan fahe kareta ambulansia 2 no funerario 2 nian ba kada munisipiu, loke bairo foun ba povu, BUP sei hetan duni konfiansa hosi Povu Timor-Leste hodi lidera governu tuir mai.

“Kareta ambulansia dadauk ne’e ami iha ona 3 ne’ebe utiliza ona ba komunidade, ami oferese kareta ne’e sem hare’e koor politiku nian, se-se mak persiza bele uza hotu, gratuitu, la selu ida,” dehan Kupa.

Ema numeru rua iha BUP ne’e esplika, dadauk ne’e estrutura BUP metin ona iha munisipiu hotu, inklui foin lalain ne’e lider nasional BUP nian fo posse ba estrutura Munisipiu Ainaro nian ne’ebe lidera hosi Armando Xavier, inklui inagura nia sede munisipiu iha Mau-Hulo, Ainaro Villa, Sabadu (14/01/2017).

“Tomada posse ne’ebe ami halo iha munisipiu sira nu’udar forsa id aba BUP hodi konsolida nia politika no hametin estrutura iha teritoriu Timor-Leste tomak, ho prezensa BUP iha teritoriu hotu, ami fiar meti votos konfiansa ami sei hetan duni hosi povu,” nia hateten.

BUP deklara hosi partidu politiku 4 iha Jullu 2015 ho objektivu, partidu sira ne’ebe la hetan asentu iha PN ne’e, bele sai forsa politiku bo’ot ida iha Timor-Leste hodi bele ganha konfiansa hosi povu.

Jornalista: Gantry Meilana / Editor: Alberto Alves

Foto: Prezidenti BUP, Cecilio Caminha Freitas (klaran) hamutuk ho Vise Prezidenti BUP (boina metan), Ermenegildo Kupa Lopes ho estrutura BUP balun kua keek wainhira fo posse ba estrutura Munisipiu Ainaro iha Sabadu (14/01/2017). Photo: Dok Kupa