Ukun Nain Laiha Vontade Kombate Korupsaun

DILI – Publik kestiona ukun nain sira iha rai laran laiha vontade kombate korupsaun, tanba autor neebe maka komete iha aktu korupsaun sei lao livre hela.

Tuir dadus neebe maka iha, autor koruptor sira neebe maka ba hatan ona iha Tribunal maka hanesan Eis Ministra Finansas Emilia Pires, Eis Vise Ministra Saude Madalena Hanjam, eis Ministru Edukasaun Joao Cancio, eis Sekertariu Estadu Obras Publik Domingos Caero no sira seluk tan.

Maske ema hirak nee Tribunal ba hatan ona iha Tribunal, maibe sira sei lao livre hela iha rai laran. Tanba nee ema hotu kestiona katak, Tribunal labrani atu lori autor koruptor sira nee ba sulan iha kadeia, tanba deskonfia iha grupu balu suporta makas husi ema hirak nee nia kotuk.

Prezidente Partidu Parentil Flavio Pereira Lopes hateten, ukun nain sira laiha vontade kombate korupsaun iha rai laran, tanba ukun nain sira fo livre hela ba autor koruptor sira.

Ita nia ukun nain sira neebe maka ukun nasaun ida nee laiha vontade atu kombate korupsaun, tanba sira fo livre hela ba autor koruptor sira,” dehan Flavio ba STL, iha nia servisu fatin, pantai Kelapa, Dili, Tersa (17/01/2017).

Tempu agora tuir Flavio katak, osan maka boot, se maka riku no osan barak, osan maka ba toba kadeia, lei no justisa vale deit ba povu kbiit laek sira. Tanba ema neebe maka ukun laiha domin nasionalismu, evidensia dezempregu buras, tanba koruptor domina total iha burokrasi orgaun soberanu haat nee.

Iha parte seluk membru Parlamentu Nasional husi bankada CNRT Agostinho Lay hateten, ema hotu hotu iha komitmentu kombate korupsaun iha rai laran, tanba nee maka lori ona autor koruptor sira ba hatan ona iha Tribunal. Informasaun kompletu iha STL Jornal no STL Web, edisaun Kuarta (18/1/2017). Carme Ximenes

Suara Timor Lorosae