Edukasaun Importante Ba MarVi

DILI (ANTIL) - Pároku Parókia Soibada, Pe. Tiago Soares da Costa  nu´udar artista Maria Vitória (MarVi) nia tiun hateten temporariamente Marvi sei eskola iha Eskola Sekundária São Pedro Comoro. Ida ne´e maka dalan ida ne´ebé MarVi nia aman deside.

“Lo’os duni katak ninia kareira hanesan artista ne´e bele monu, maibé la´ós ida ne´e maka importante. Edukasaun maka importante. Kareira bele la´o no edukasaun mós tenki la´o nafatin,” Amu Tiago dehan ba ANTIL via telefónema iha Parókua Soibada, Munisípiu Manatuto, Segunda.

Nia esplika, kareira no edukasaun ne´e importante hotu, maibé importante liu maka edukasaun. Edukasaun importante tanba suporta kareira. Atu sai hanesan juri ka promotór ida, tuir Pe. Tiago, ita nia kuñesementu tenki kle´an.

“Ita bele kanta hatene maibé ita nia edukasaun la ramata, ita nian maka kanta ne´e de´it ona,” nia informa.

Tuir Amu katak governu hanoin atu apoiu MarVi maibé apoiu ne´e seidauk real.

“Foin lalais ami kontaktu Eskola Ursula Santa Maria iha Jakarta, sira fó detalladu orsamentu kona-ba koléjiu nian no propinas ninian maibé ideia balun katak estadu sei prepara fatin no prepara transporte,” nia haktuir.

“Transporte ne´e durante nia eskola iha ne´ebá ne´e nia maka aranja rasik, ou pelumenus kombustível ne´e prepara hosi estadu? Kuandu família maka haree ida ne´e, ha´u hanoin todan. Sé estadu maka ajuda entaun kapa´as liu-tan. Sé estadu la apoiu mós ha´u hanoin katak nia bele buka dalan rasik ba ninia estudu liuhusi ninia kansaun. La´ós agora maibé buat ne´e neineik,” nia salienta.

MarVi fila hikas ona mai Timor iha 13 Janeiru liu-ba no oras ne´e nia (MarVi) hela hikas iha ninia uma iha área Bairu-Pité, Palásiu Prezidénsia Repúblika nia sorin karuk.

“Uluk nia sai hosi uma ne´e, tanba ne´e nia tenki hela duni iha ninia uma. Hela iha uma la´ós problema ida,” Pároku Parókia Soibada afirma.

Jornalista: Xisto Freitas / Editór: Gantry Meilana

Foto: Pároku Parókia Soibada, Pe. Tiago Soares da Costa