terça-feira, 17 de janeiro de 2017

20 MARSU ELEISAUN PRESIDENSIAL…!!!

Jornal Nacional, editorial

Presidente Republika, Taur Matan Ruak Segunda feira horseik dekreta ona data eleisaun presidensial nian nebe sei halao 20 Marsu 2017. Presidente Republika anunsia data eleisaun presidensial nee ba publiku hafoin halo konsulta ho Partido Politiku sira nebe asentu iha Parlamento Nasional no iha governu.

Datan nebe Presidente Republika deside ona nee bele dehan eleisaun ba Presidente Republika foun Timor Leste nian nee falta loron 63 nebe hahu sura husi loron 17 fulan Janeiru nian.

“Kampaña eleitorál no eleisaun prezidensiál sei hala’o ho hakmatek no tuir orden, atu nune’e sidadaun sira bele sai informadu hodi hili tuir sira-nia hakarak,” Presidente Republika, Taur Matan Ruak.

Los duni senhor Presidente Republika, kampaña eleitoral too loron eleisaun nee festa demokrasia, festa povu nian atu eskolha lideransa foun, figura foun hodi tuur iha kadeira numeru UM (1) iha Estadu República Democrática de Timor – Leste (RDTL) maibe festa demokrasia nee mos dala balu mosu ‘muturabu’.

Tan nee, apelo Xefi Estado, TMR nian nee importante tamba laos festa demokrasia ona ne’ebe ida idak halo tuir hakarak ka tuir gostu, lae demokrasia nee kada sidadaun iha direitu ba espresaun, direitu atu deside iha ambitu eleisaun tenki tuir sufrajiu universal, jeral, libre no sengredu.

Povu, li-liu eleitor sira tenki libre husi sufrajiu universal nee, labele iha ameasas, intimidasaun ka terror ka maineira oin seluk hodi influlensia liberdade sidadaun ida idak nian hodi eserse direitu ba vota.

Ho anunsiu nee, loke ona tenda festa demokrasia nian, eleisaun presidensial, li-liu partido politiku sira, figura publiku atu kandidata an ka ema seluk ka partido politika sira kandidata  ba kompete iha eleisaun demokratiku mai.

Dekretu presidensial nebe iha sai base ba Sekretáriado Tekniku Administrasaun Eleitoral (STAE) hodi halo kalendariu eleisaun nian. Apresentasaun kandidatura iha tribunal rekursu, kampanha eleitoral, loron eleisaun nian, apuramentu nasional no anunsia resultadu eleisaun nian.

Laiha duvida tan ona ba loron eleisaun nian? agora oinsa ho preparasaun STAE nian nudar instituisaun governu nian nebe tutela ba organiza eleisaun tomak iha rai laran? Fasilidade, rekursu humanos no rekursu finanseiru suficiente?

 Osan 10 milhões dollar americano nebe governua aloka ba STAE nee suficiente atu bele organiza eleisaun tamba ho osan nee bele sosa fasilidade, rekruta brigadas 600 resin no mos prosesu tomak eleisaun nian atu nunee eleisaun presidensial ba tinan nee tenki kredibel hodi hetan prestiju internasional.

Agora koalia ba kandidatu Presidente Republika iha tinan 2001 iha kandidatu Presidente Republika nain 2, Xanana Gusmão ho matebian Francisco Xavier do Amaral (Xanana eleitu primeira volta).  Eleisaun Presidensial iha tinan 2007 iha kandidatu nain 8, kandidatu Jose Ramos ho Lu- Olo tama segunda volta (Horta eleitu) no iha Eleisaun Presidensial 2012 iha kandidatu 12, ikus mai, Taur Matan Ruak ho Lu-Olo tama  segunda volta (Taur eleitu), agora oinsa eleisaun 2017? Sei iha nakukun laran.

Eleisaun presidensial ba tinan nee, Lu-Olo kontinua kandidata, agora semak sai adversariu importante Lu-Olo nian. Semana hirak nia laran nee publiku sei hatene kandidatu Presidente Republika 2017 nian. *

Sem comentários: